11-nji noýabrda Mary welaýatynda giň gerimli arassaçylyk işleri geçirilip başlandy we köçelere gözegçilik güýçlendi. Ýaşaýjylara we telekeçilere ot ýakmazlyk berk tabşyryldy. Bu talabyň berjaý edilşine gözegçilik etmek üçin geňeşlikleriň tas ählisinde ýörite howpsuzlyk işgärleri ýerleşdirildi. Şeýle-de, ak we kümüşsöw reňklerinden başga reňkdäki ulaglaryň köçä çykmagyna dilden gadagançylyk girizildi. Bular prezident Serdar Berdimuhamedowyň ýa-da onuň kakasy Gurbangulynyň sebite amal etmegi mümkin saparyna görülýän taýýarlykaryň çäginde geçirilýär.
"Daňdan köçeler ýuwulyp, ähli edara-kärhanalarda arassaçylyk işleri geçirilip başlandy. Jemagat hojalygy müdirliginiň işgärleriniň köçeleri arassalamakdan ýaňa gözleri açylmaýar. Dik uçardan seredeniňde göze ilýän kärende ýerleriň, ekin meýdanlarynyň haşal otlary hem çapylýar. Ýaşaýyş jaýlarynyň üçekleri köne bolsa, ony çalşyp täzelemegiň deregine, ýaşyl reňke boýaýarlar" diýip, ýagdaýdan habarly çeşmämiz aýtdy.
Maryly býujet işgärleriniň ençemesiniň habarçymyza aýtmagyna görä, her kärhanadan, işgär sanyna görä, 5-10 adamyň köpçülikleýin çärelere gatnaşmalydygy barada edara ýolbaşçylaryna tabşyryklar hem gelip gowuşdy.
Degişli maglumat Gurbanguly Berdimuhamedow TDG sammitine hormatly myhman hökmünde gatnaşýarWelaýat ýaşaýjylaryna we telekeçilere, şol sanda kafeleriň, restoranlaryň eýelerine duşenbe gününe çenli ot ýakyp, tüsse çykarmazlyk berk tabşyryldy.
"Geňeşlikleriň her birinde ýörite howpsuzlyk işgärleri ýerleşdirildi. Olar ýaşaýjylaryň ot ýakmazlygyna gözegçilik edýärler" diýip, çeşmämiz belledi.
Bu başagaýlyklar, habarçymyzyň maglumatyna görä, döwlet baştutany Serdar Berdimuhamedowyň ýa-da öňki prezident, häzir Halk maslahatynyň başlygy Gurbanguly Berdimuhamedowyň welaýata etmegine garaşylýan sapary bilen baglanyşykly.
"Häzir anyk kimiň we haçan geljekdigi belli däl. Ýöne Berdimuhamedowlaryň biriniň Ýolöten etrabynda täze gaz edarasynyň düýbüni tutmana gelýändigi aýdylýar" diýip, çeşmämiz aýtdy.
Bu sapar we oňa görülýän taýýarlyklar barada, adatça bolşy ýaly, ne türkmen häkimiýetleri, ne-de media serişdeleri habar berýärler. Şol sebäpli bu saparyň amala aşjakdygy ýa aşmajakdygy, şeýle-de anyk kimiň ýa kimleriň sebite geljekdigi soňky pursada çenli nämälim bolup galýar. Azatlyk bu barada welaýat häkimliginden goşmaça maglumat ýa kommentariýa hem alyp bilmedi.
Türkmenistanda şeýle taýýarlyklar adatça döwlet baştutanynyň sebitlere etjek saparlarynyň öňüsyrasynda bolýar. Ýöne soňky aýlarda şeýle taýynlyklar Gurbanguly Berdimuhamedowyň sebitlere saparlarynyň öňüsyrasynda hem bolup geçýär.
Marydaky taýýarlyklar ýokarda aýdylanlar bilen çäklenmeýär. Şäherdir etraplarda ak, kümüşsöw reňklerinden başga reňkdäki ulaglar ýol polisiýasy tarapyndan saklanýar we polisiýanyň awtoduralgasyna alnyp gidilýär.
Degişli maglumat G.Berdimuhamedow Mara bardy. Howpsuzlyk güýçlendirildi, köçeler ýapyldy"Polisiýa ulaglary jerime duralgasyna äkidilen raýatlara 'awtoulagyňyzy almaga duşenbe güni geliň' diýýär" diýip, efirde atlandyrylmasyzlygyny soran sakarçägeli ýaşaýjy aýtdy
Habarçymyz ýaşaýjylardan köp gatly jaýlaryň arasynda goýlan ulaglary ýol tarapdan görünmeýän ýerlerde goýmagyň talap edilýändigini hem aýdyp, raýatlaryň taýýarlyklardan juda nägiledigini belleýär.
"Bu Berdimuhamedowlardan dynmadyk. Biz tamdyrda çörek hem ýapyp bilmeýäris. Bular häzir asmanyň reňki gök däl-de, ak bolsun diýse-de, geň görjek däl. Çaltrak gelip gitseler, bizem arkaýyn gündelik durmuşymyza dolansak" diýip, maryly ýaşaýjy anonimlik şertinde aýtdy.
Bu aralykda, Maryda görülýän taýýarlyklar barada garaşsyz "Turkmen.news" neşiri hem habar berýär. Neşir 11-nji noýabrda çap eden maglumatynda döwlet baştutanyň sebite sapar etmegine garaşylýandygyny, welaýatda hereketiň ep-esli çäklendirilendigini, käbir ýollaryň ýapylandygyny aýdýar.
Degişli maglumat Mary: Ak reňk talaplary bilen bagly saklanan ulaglar prezidentiň saparyndan soň tölegsiz boşadyldyGadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.