Ýewropa Komissiýasynyň agzalary Wengriýanyň premýer-ministri Wiktor Orban tarapyndan geçiriljek resmi däl ýygnaklary boýkot ederler we Budapeştiň Ýewropa Bileleşiginiň alty aýlyk prezidentlik möhletiniň dowamyndaky duşuşyklarynda olaryň ýerine pes derejeli resmiler wekilçilik ederler. Bu barada Ýewropa Komissiýasy Orbanyň Russiýanyň we Hytaýyň liderleri Wladimir Putin we Si Szinpin bilen geçiren rugsat berilmedik duşuşyklaryndan soň yglan etdi.
Ýewropa Komissiýasynyň prezidenti Ursula fon der Leýeniň baş metbugat wekili Erik Mamer Ýewropa komissiýasynyň 27 agzadan ybarat ýolbaşçylygy bolan Kollegiýanyň ÝB-niň häzirki ýolbaşçysy Wengriýa sapar etmejekdigini habar berdi.
Wengriýa muňa garşy çykdy. Ýurduň Ýewropa işleri boýunça ministri Ýanoş Boka komissiýany işleşmek isleýän guramalaryny we agzalaryny "saýlap-seçmekde" aýyplady.
Komissiýanyň bu karary Ýewropa Bileleşiginiň daşary syýasat boýunça başlygy Josep Borrelliň awgustda Wengriýanyň planlaşdyrýan ýygnagyna gabat, öz "resmi" duşuşygyny geçirjek bolýandygy barada "Politico" žurnalynda çap bolan tassyklanmadyk habaryň yz ýanyna gabat geldi.
1-nji iýulda ÝB-niň prezidentligine geçen Wengriýanyň premýer-ministri Orban, 5-nji iýulda Moskwa sapar etdi, ondan soň hem Hytaýda boldy. Ol Putin we Şi bilen Ukrainadaky urşy togtatmak barada geçirendigine meňzeýän gepleşikleri barada Bileleşigi öňünden habarly etmändi.
Putin bilen dostlukly gatnaşyklary saklaýan Orban, ÝB-niň beýleki agzalary bilen kän oňuşman, Russiýanyň Ukrainadaky urşy sebäpli Moskwa girizilýän sanksiýalara hem garşy çykýar.
Orban Kremlde Putin bilen geçiren gepleşiklerinden soň beren metbugat ýygnagynyň dowamynda, munuň garşylykly taraplaryň arasynda “dialogy ýola goýmak boýunça birinji ädim” bolandygyny aýtdy. Emme onuň öz-özünden yglan eden parahatçylyk missiýasyny ÝB we ABŞ ýiti tankytladylar.
Forum