Ukrainanyň aňtaw gulluklarynyň maglumatyna görä, Russiýanyň günbataryndaky Kursk regionynda Russiýa tarapynda söweşýän demirgazyk koreýaly azyndan 30 esger ýa öldürildi, ýa-da ýaralandy. Bu Phenýanyň Moskwa hemaýat hökmünde öz esgerlerini ýollamagyndan soň, Kiýewiň bu görnüşli beren ilkinji jikme-jik hasabaty boldy.
Ukrainanyň harbylarynyň Esasy aňtaw direktoranynyň (GUR) 16-njy dekabrda ýaýradan beýanatyna görä, Martynowka, Plekhowo we Worožba obalarynyň golaýynda Demirgazyk Koreýanyň esgerleri “möhüm ýitgilere” duçar bolupdyrlar.
16-njy dekabrda Ukrainanyň harbylarynyň Azat Ýewropa/Azatlyk Radiosynyň “Shemy” atly derňew bölümine ýollan maglumatlarynda we suratlarynda, Kursk regionynda heläk bolandygy aýdylýan adamlaryň jesetlerini görse bolýar. Olaryň arasynda Demirgazyk Koreýadan gelen esgerleriň bardygy hem nygtalýar.
Azat Ýewropa/Azatlyk Radiosy bu maglumatlary garaşsyz ýagdaýda tassykladyp bilmedi. Russiýa bu beýanat bilen ilteşikli entek hiç zat aýtmady.
Ukrainanyň esgerleri Russiýanyň Kursk regionyna awgustda girdiler we entegem käbir sebitleri öz gözegçiliginde saklaýarlar. Oktýabrda Russiýa bu sebitlere Demirgazyk Koreýadan gelen müňlerçe esgerleri ýerleşdirip başlady.
Ukrainanyň prezidenti Wolodymyr Zelenskiýiň 14-nji dekabrda beren maglumatyna görä, Moskwa Kursk regionynda ukrain güýçlerine garşy durmak üçin, has köp demirgazyk koreýaly esgerleri çekip başlapdyr.
Käbir maglumatlarda Russiýanyň günorta-günbatar sebitlerine 11 müňden hem aşa demirgazyk koreýaly esgeriň ýerleşdirilendigi bellenilýär. Munuň bilen, Russiýanyň ýitgileriniň 600 müňden hem aşandygy baradaky käbir habarlaryň arasynda, rus prezidenti Wladimir Putiniň syýasy taýdan meşhur bolmadyk ikinji mobilizasiýany geçirmegi islemeýändigne meňzeýär.
Şol bir wagtda, Ukrainanyň Howpsuzlyk Gullugynyň (SBU) Azatlyk Radiosynyň Ukrain gullugyna beren maglumatyna görä, geçen hepde Kiýew Russiýa tarapyndan okupirlenen Ukrainanyň gündogaryndaky Donetsk regionynyň Markyne obsynda, dronlar bilen ruslaryň ok-däri ammaryny nyşana alyp, ony ýok edipdirler.
Bu aralykda, 16-njy dekabrda irden, Russiýa Ukraina garşy Şahed kysymly 49 sany pilotsyz enjamy atdy. Kiýew 27 dronuň urlup düşürilendigini, 19-synyň hem gözegçilikden ýitendigini habar berdi.
Ukrainanyň harbylary dronlaryň hiç biriniň nyşana baryp urmandygyny, şeýle-de munuň bilen bagly adam ýitgileri ýa-da weýrançylyk barada maglumat gowuşmandygyny belledi.
Forum