Russiýanyň Goranmak ministrligi ýurduň alty sebitiniň asmanynda Ukrainanyň 55 sany pilotsyz uçarynyň urlandygyny habar berdi. Pilotsyz uçarlaryň Smolenskdäki uçar zawodyna hüjüm edendigi aýdylýar.
Ministrligiň tassklamagyna görä, howa goranyş ulgamlary Braýansk sebitinde 22, Rostow sebitinde 12, Smolensk sebitinde on, Woronež sebitinde alty, Saratow sebitinde dört we Kurskda bir pilotsyz uçary saklamagy başardy.
“Baza” telegram kanalynyň habaryna görä, Woronež sebitinde Liski şäherine hüjüm edildi. Sebit başlygy Aleksandr Gusew birnäçe pilotsyz uçaryň ýok edilendigini tassyklady. Urlup ýykylan dronlaryň biri Liski etrabynyň nebit ammarynda ýangyn turmagyna sebäp boldy. Ejir çekenleriň bolmandygy aýdylýar.
“Şot” telegram kanaly, şaýatlara salgylanyp, pilotsyz uçarlaryň hüjümi netijesinde Smolenskde köp gatly ýaşaýyş jaýlarynyň azyndan ikisine zyýan ýetendigini ýazýar: Borodinskaýa köçesindäki binada uly ýangyn boldy, Awtozawodskaýa köçesindäki köp gatly binanyň üçegine pilotsyz uçaryň galyndylary gaçdy.
“Astra” telegram” kanalynyň maglumatyna görä, Smolenskde uçar zawodynyň ot alandygy aýdylýar. “Şot” bu hüjümiň nyşanynyň Smolensk awiasiýa zawody we Ýarsewodaky nebiti gaýtadan işleýän zawod bolandygy baradaky çaklamany öňe sürýär.
Smolensk sebitiniň gubernatory Wasiliý Anokhin sosial ulgamlarda ukrain dronlarynyň Russiýanyň howa gorag güýçleri tarapyndan ýok edilendigini aýtdy.
21-nji ýanwar güni irden pilotsyz uçar hüjümleri howpy Kazanda we Ulyanowskde saklanyp galdy, ýerli howa menzilleri "Haly" meýilnamasyny girizdi we uçar gatnawlaryny togtatdy.