14-nji ýanwarda irden pilotsyz uçarlar Engelsdäki “senagat kärhanasyna” ýene bir gezek hüjüm etdi. Kazanda, Kalugada, Saratowda we Tambowda howa menzilleriniň işi çäklendirildi. Rus telegram kanallary pilotsyz uçarlaryň Kazandaky “Orgsintez” himiýa zawodyna hüjüm edendigini habar berýär.
Saratow sebitiniň gubernatory Roman Busarginiň aýtmagyna görä, pilotsyz uçar hüjümi netijesinde Engelsdäki "senagat kärhanasyna" zyýan ýetdi. Ol bir hepde öň dron zarbasy urlan nebit ammaryny hem “senagat kärhanasy” diýip atlandyrypdy. Şondan soň başlanan ýangyn diňe 13-nji ýanwarda öçürildi.
"Gyssagly kömek we operasiýa hyzmatlary güýçlendirilen tertipde işleýär" diýip, Busargin 14-nji ýanwar güni irden ýazdy.
SHOT telegram kanaly ýerli ýaşaýjylara salgylanyp, şäherde partlamalaryň bolandygyny habar berdi. Russiýanyň “Radar.ru” gözegçilik kanalynyň habaryna görä, pilotsyz uçarlar Engels şäherine täze hüjüm edýär.
Pilotsyz uçar hüjümleri sebäpli Engelsde we Saratowda mekdeplerdäki sapaklar uzak aralykdan geçiriler.