Rus häkimiýetleri 18-nji dekabrda özleriniň bir özbek raýatyny tussag edendiklerini, onuň Ukrainanyň aňtaw gullugynyň tabşyrygy esasynda, ýokary derejeli rus ofiserini öldürmäge niýetlenen partlaýjy enjamy partladylan ýerinde goýandygyny boýun alandygyny aýtdylar we Kiýewi “terrorçylykda” aýypladylar.
General-leýtenant Igor Kirillow, Russiýanyň ýadro, biologiýa we himiki gorag güýçlerine (RKhBZ) serkerdelik edýän ýokary derejeli ofiser we onuň kömekçisi 17-nji dekabr güni irden, Moskwadaky binanyň girelgesiniň daş işiginde goýlan skuterde gizlenen bombanyň partladylmagy netijesinde öldürildi.
Bu hüjümiň jogapkärçiligini resmi taýdan hiç bir tarap öz üstüne almadyk hem bolsa, Ukrainanyň Howpsuzlyk Gullugyndaky bir çeşme Azat Ýewropa/Azatlyk Radiosyna bu partlamanyň SBU, ýagny Ukrainanyň howpsuzlyk gullugy tarapyndan gurnalan ýörite operasiýasynyň netijesi bolandygyny aýtdy.
Russiýanyň Federal howpsuzlyk gullugy (FSB) 18-nji dekabrda çap eden beýanatynda Ukrainanyň ýörite gulluklarynyň bu işe bir adamy çekip, oňa tälim berendigini aýtdy, ýöne güman edilýäniň adyny aýtmady.
FSB güman edilýän adamyň, Ukrainanyň tabşyrygy boýunça, "Moskwa gelip, öý şertlerinde ýasalan güýçli partlaýjy enjamy alandygyny we ony [General Igor] Kirillowyň ýaşaýan jaýynyň girelgesiniň golaýynda goýlan elektrik skuterine ýerleşdirendigini" aýtdy.
Beýanatda güman edilýän adamyň ol bombany Kirillow we onuň kömekçisi binadan çykyp barýarka herekete getirendigi aýdylýar.
Şeýle-de, beýanatda güman edilýän adamyň 1995-nji ýylda doglandygy, oňa adam öldürmek üçin 100 müň ABŞ dollarynyň we Ýewropa ýurdunda ýaşamak rugsadynyň berlendigi aýdylýar. Şübheli adam, aýdylmagyna görä, bu diýilýän jenaýat üçin ömürlik türme tussaglygy bilen ýüzbe-ýüz bolar.
"Ukrainanyň ýörite gulluklarynyň terrorçylykly hüjümi gurnamak bilen meşgullanýan işgärleri gözlenip tapylar we degişli jezalaryny alar” diýip, FSB aýtdy.
54 ýaşly Kirillow Russiýanyň 2022-nji ýylyň fewral aýynda Ukraina garşy başlan giň gerimli urşunyň başyndan bäri görnetin kast edişlik netijesinde öldürilen iň ýokary derejeli rus harbysy bolar.
Krillowyň janyna kast edilmegi SBU-nyň ukrain prokurorlarynyň oňa garşy aýyplama bildirendigini habar beren gününiň yz ýanyna gabat geldi. Ukrain häkimiýetleri ony bir gün öň Russiýanyň Ukraina esassyz çozmagy bilen başlanan uruşda ukrain goşunlaryna garşy gönükdirilen himiki ýaraglaryň ulanylmagyna jogapkär bolmakda aýyplady.
SBU rus güýçleriniň Ukrainadaky uruş wagtynda, Kirillowyň ýolbaşçylyk etmeginde, himiki ýaraglary tasdan 5000 gezek ulanandygyny öňe sürdi.
RKhBZ radioaktiw, himiki we biologiki zäherlenme şertlerinde işleýän ýörite güýçleri aňladýar.
Kirillow Russiýada we Russiýa tarapyndan basylyp ukrain sebitlerinde öldürilmeli rus ofiserleriniň we uruşparaz şahsyýetleriň biri bolup durýar. Ol Moskwanyň uruşda ulanýan ganatly raketalaryny öndürýän rus kompaniýasynyň ýokary derejeli resmisiniň paýtagtyň daşynda atylyp öldürilendigi barada berlen habaryň bir hepde soňundan öldürildi.
Kirillow Azat Ýewropa/Azatlyk Radiosynyň Rus gullugynyň derňewiniň merkezinde, Moskwanyň daşynda ýerleşýän we jikme-jiklikleri açylan çäklendirilen desgada görkezilýän şahslaryň biri bolup durýar. ABŞ-nyň ynandyrmagyna görä, Russiýa BMG-niň Biologiki ýarag konwensiýasyny bozup, biologiki hüjüm ýaraglary programmasyny işläp düzüpdir.
Forum