Gazak hökümeti ýurtda ýadro elektrik desgasyny gurmak planlaryna garşy geçirilýän protestleriň arasynda, bu boýunça referendum geçiriljekdigini yglan etdi. Bu barada 27-nji awgustda mälim edildi.
Tutuş ýurt boýunça geçiriljek plebissitiň anyk senesi indi kesgitlenilmeli.
Soňky hepdeleriň dowamynda ýurtda ýadro elektrik desgasynyň gurulmagyna garşy çykyş edýän ençeme aktiwist, bu mesele boýunça jemgyýetçilikde geçirilen debatlara gatnaşdyrylmady.
Gazagystanda ýadro desgalary baradaky mesele jedelli bolmagynda galýar. Sowetleriň 1949-1991-nji ýyllar aralygynda geçiren ýadro synaglary, şeýle-de Russiýa tarapyndan häzire çenli ulanylýan Baýkonur älem-merkezi ýurduň daşky gurşawyna juda ýaramaz täsir ýetirdi.