Şu ýyl Astrahan sebitine Türkmenistandan umumy agramy 835 tonnadan gowrak bolan 90 partiýa pomidor getirildi, bu geçen ýyl bilen deňeşdirilende bäş esse köp pomidoryň import edilendigini aňladýar diýip, rus metbugaty habar berýär.
Habarda aýdylmagyna görä, Astrahanyň deňiz portuna Türkmenistandan 18 tonna pomidor geldi, “Rosselhoznadzoryň” hünärmenleri bu önümleriň iki toparyny barladylar we laboratoriýa synaglarynyň esasynda fitosanitar şahadatnamalaryny berdiler.
Täze ýyl baýramçylygynyň öňüsyrasynda bu önümlere bolan isleg ep-esli ýokarlanýar we bu ýagdaý bahalara hem täsir edýär.
Pomidoryň käbir görnüşleriniň bir kilogramynyň bahasy 800 rubla, dekabr tekjelerindäki ortaça bahasy bolsa 250-300 rubla ýetýär diýip, habarda bellenýär.
Mundan öň Azatlyk Türkmenistandan Russiýa eksport edilen pomidorlarda zyýanly möjekleriň tapylandygyny habar beripdi.
Mysal üçin, Russiýanyň Orenburg oblasty boýunça oba hojalyk gözegçisi “Rosselhoznadzor” 28-nji dekabrda we 9-njy ýanwarda ammarlarda geçiren fitosanitariýa barlagynda Türkmenistandan getirilen 37 tonna pomidorda zyýankeş mör-möjekleriň bardygyny anyklady.
Bu barada rus gözegçi edarasy 10-njy ýanwarda habar berdi.
Maglumata görä, ýerli kanunçylyga laýyklykda, bu önümleriň ýurda salynmagyna gadagançylyk girizilipdir, günäkär şahs administratiw jogapkärçilige çekilipdir we ýük gelen ýurduna, yzyna iberilipdir.
