Amerikan we polýak resmileri Polşanyň demirgazygyndaky Redzikowoda köpden bäri garaşylýan raketa goranyş bazasynyň dabaraly açylyşyna gatnaşdylar.
NATO goragyna integrirlenen ABŞ desgasynda ABŞ-nyň Harby deňiz güýçleriniň Aegis Ashore ulgamy ýerleşýär. Bu ulgam ballistik raketalary uçuşlarynyň başlangyç döwründe ýüze çykaryp, yzarlamak we ýok etmek üçin ulanylýar. Bu hili ulgam Ýewropada 2016-njy ýylda, NATO agzasy bolan Rumyniýada ilkinji gezek işe girizildi.
Ilkinji gezek 2009-njy ýylda mälim edilen baza ilkibaşda Ýewropany Eýrandan abanyp biljek ballistik raketa howplaryndan goramagyň bir çäresi hökmünde meýilleşdirilipdi. Polýak resmileri bu desganyň açylmagyny gutlap, ony taryhy çäre atlandyrdylar.
Bu desganyň gurulmagyna uzak wagt bäri öz howpsuzlygyna abanjak wehim hökmünde garaýan Russiýa 13-nji noýabrda bazanyň açylmagynyň "deňeçerligi üpjün etjek" çäreleriň görülmegini talap etjekdigini aýtdy.