Aşgabadyň ýaşaýjylaryndan Täze ýyl gijesi öýlerinden çykmazlyk we çagalaryny çykarmazlyk talap edilýär. 31-nji dekabr gijesinden 1-nji ýanwara geçýän gije öýlerinde bolmak talaby ilata edara-kärhanalarynyň üsti bilen şeýle-de şäher polisiýa işgärleriniň öýme-öý aýlanyp, berýän duýduryşlarynyň üsti bilen ýetirilýär.
Azatlygyň paýtagtdaky çeşmelerine görä, Aşgabadyň etrap polisiýa işgärleri öýme-öý aýlanyp, hojalyklaryň maşgala başyndan Täze ýyl gijesinde çagalarynyň öýden daşary çykmajagy we olaryň topar bolup köçede gezelenç etmejegi barada dilhatyny ýazmagy talap edýärler. Ene-atalaryň ýazmaly bolýan dil hatynda pirotehniki serişdeleriň atylmajagy, partlaýjy serişdeleriň we bengal şemleriniň ýakylmajagy barada aýdylýar.
Paýtagtyň köçelerinde nobatçylyk edýän polisiýa işgärleriniň sany köpeldi.
Aşgabadyň köçelerine gözegçilik edýän polisiýanyň düzüminde welaýatlardan getirilen polisiýa işgärleriniň ençemesi bar. Çeşmeler baýramçylyk günlerinde paýtagtda gözegçilik etmek üçin welaýatlardan iş sapary bilen ýüzlerçe polisiýa işgäriniň getirilendigini we olaryň tertip düzgüne gözegçilik edýändigini aýdýarlar.
Azatlyk bilen anonimlik şertinde gürleşen paýtagtyň ýaşaýjylary bolsa, polisiýa işgärleriniň köçede raýatlara basyş edýändigini aýdýarlar.
"Häzir paýtagtyň köçelerinde ýaşaýjylardan polisiýa işgärleriniň sany köp görünýär. Olar ilata basyş görkezip, çilim çekýänleri gözleýärler ýa-da köne egin-eşikli adamlary görseler olary polisiýa bölümine äkidip jerime salýarlar we gorkuzýarlar, ruhy basyş edýärler" diýip, paýtagtyň ýaşaýjysy 30-njy dekabrda gürrüň berdi.
Paýtagtlylaryň ýene biri ýetginjek çagalaryň polisiýanyň nyşanyna düşýändigini gürrüň berdi.
"Polisiýa esasan ýaş ýetginjekleriň topar bolup daşarda gezmekleriniň öňüni alýar. Olardan öýli öýüne dargamaklyk talap edilýär, garşylyk görkezýän ýaşlary polisiýa bölümlerine eltip, ruhy basyşa sezewar edýärler" diýip, aşgabatly ýaşaýjy gürrüň berdi.
Türkmenistanda baýramçylygyň öňýany gözegçilik çäreleri ýyllarboýy güýçlendirilýär. Soňky ýyllarda Täze ýyl baýramçylygyny bellemezlik talaby güýçlendi. Geçen ýyl hatda çagalar baglarynda baýramçylyk oturylyşyklary gadagan edildi.
Ilatyň baýramçylykda berk çäklendirmelere sezewar edilmeginiň sebäpleri resmi taýdan düşündirilmeýär.
Şu ýyl Täze ýyly bellemezlik duýduryşy noýabr aýynda berlip başlandy. Aşgabadyň orta mekdeplerinde bilim resmileri okuwçylara öýlerinde we köçelerde Täze ýyl baýramyny bellemezligi tabşyryp, talaby berjaý etmedik okuwçylaryň we olaryň ene-atalarynyň administratiw temmilere sezewar ediljekdigini duýdurdylar. Bu barada Azatlyk Radiosynyň habarçysy 18-nji noýabrda paýtagtdan maglumat berdi.
Täze ýyl baýramçylygyň öňýany ýurduň içindäki howa, demirýol we awtoulag transportyna bilet satyn almakda kynçylyk döredi.
Azatlygyň habarçysy baýramçylyk günlerinde paýtagtyň we welaýatlaryň arasynda gatnawyň janlanýandygyny, adamlaryň başga welaýatlardaky dogan-garyndaşlaryny görmäge howlugýandygyny belledi. Şu günler "Türkmen howaýollary" agentliginiň kassalarynda uly nobatlar saklanýar, emma köplenç bilen bolmaýar.
"Adamlar ir daňdan 5-den howa agentliginiň kassasynda nobata durýarlar. Emma irden sagat 9-da kassalar açylan badyna ýolagçylar içeri girip, welaýatlara uçar biletlerini soranlarynda kassadaky işgärler petekleriň satylyp gutarandygyny aýdýarlar we onlaýn satyn almagy maslahat berýärler. Emma saýta onlaýn girmek örän kyn, satyn almak üçin onlaýn tölegler hem geçmeýär" diýip, çeşme gürrüň berýär.
Türkmenistanda onlaýn hyzmatlary girizilýän hem bolsa, ýurtdaky internetiň örän haýallygy ilatyň bu hyzmatlardan peýdalanmak mümkinçiligini çäklendirýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum