Ýokary we orta hünär okuw mekdeplerinde talyplardan Täze ýyl baýramçylygyny bellemezlik barada dilhaty alynýar. Bu barada Azatlyk Radiosynyň habarçysy 6-njy dekabrda Mary welaýatyndan maglumat berdi.
“Talyplar täze ýyl baýramçylygynda kafelerde ýa-da öýlerde oturylyşyk geçirmezlik, baýramçylyk gijesinde şäherde aýlanmazlyk barada dilhaty ýazyp tabşyrýarlar” diýip, çeşmeler aýdýar.
Şeýle-de, talyp ýaşlar baýramçylykda döwlet tarapyndan guramalaşdyrylýan çärelere mejbury gatnaşmaga boýun bolýarlar.
Bu talaplar berjaý edilmedik halatynda, talyplar okuw jaýyndan çykarylmak howpy bilen ýüzbe-ýüz bolýarlar.
“Mundan öňki tejribelerden mälim bolşuna görä, eger-de baýramçylykda gizlin oturylyşyk geçirilse, munuň hem mugallymlar tarapyndan üsti açylsa, ýaşlaryň gözüni gorkuzmak üçin, birnäçe talyby, köplenç ýokary okuw jaýlaryny tamamlap barýan talyplary okuwdan çykarýarlar” diýip, çeşmeler aýdýar.
Biraz öň, Azatlyk Radiosynyň habarçylary Aşgabat şäheriniň orta mekdeplerinde bu çäreleriň eýýäm noýabrda başlanandygyny habar berdiler.
Şonda mugallymlar okuwçylara duýduryş berip, Täze ýylda goňşular, dogan-garyndaşlar bilen baýramçylyk bellemegiň gadagan edilýändigini aýtdylar.
Olar şonda bu tabşyryklar boýunça Bilim ministrliginden ýörite görkezmäniň gelip gowşandygyny ileri sürdüler.
Mary welaýatynda talyplara ýazdyrylýan dilhatlarynda olar döwlet çärelerine gatnaşandan soňra, umumy ýaşaýyş jaýlarynda bolmaga borçlanýarlar.
“Kursdaşlar bilen Täze ýyl baýramçylygyny bellemeklik, hakykatdan-da, gadagan edilýär” diýip, Mary welaýatynyň okuw jaýlarynyň birinde bilim alýan talyp aýdýar.
Türkmen metbugatyna görä, ýurtda baýramçylyga taýýarlyk çärelerine eýýäm badalga berlip, paýtagt Aşgabatda ýerleşjek Baş arçanyň yşyklarynyň 14-nji dekabrda ýakylmagyna garaşylýar.
Geçen hepde Azatlyk Radiosynyň gündogar welaýatdaky çeşmeleri hem Lebap welaýatynyň administratiw merkezinde baýramçylygyň öňüsyrasynda öýsüz haýwanlaryň öldürilip başlanandygyny habar berdiler.
Türkmenistanda ähli baýramçylyklar, şol sanda Täze ýyl baýramçylygy berk häkimiýet gözegçiligi astynda bellenip geçilýär.
Häkimiýetler öňki ýyllarda hem döwlet edara-kärhanalarynda, ýokary okuw jaýlarynda we beýleki ýerlerde raýatlar bilen ir gözinden gürrüňdeşliklere başlap, baýramçylyk gadaganlyklary barada duýduryş berdiler. Hususan-da, geçen ýylda şeýle gözegçilik çäreleriniň depgini güýçlendi.
Üstümizdäki ýyla geçilende döwlet edaralarynyň öňünde täze ýyl arçasyny oturtmak däbi çäklendirildi. Mekdeplerde we çagalar baglarynda täze ýyl oturylyşklary ýatyryldy, ýa-da olaryň çäkli geçirilmegine rugsat berildi.
Ýöne ondan öňki ýyllarda hem täze ýyl oturylyşyklarynyň gadagan edilmegi ýaly berk gözegçilik işleri ýerine ýetirildi.
Täze ýyl baýramçylygy Türkmenistanda maşgala baýramçylygy hökmünde bellenip geçilýär, 1-nji ýanwar ýurtda baýramçylyk mynasybetli iş güni däl diýlip yglan edilýär.
Döwlet mediasy baýramçylyk dabaralary barada habar berýär, ýöne onuň fonunda girizilen gadaganlyklary we gözegçilik çärelerini agzamaýar.
Hatda öňki ýyllardan tapawutlylykda, geçen ýyl döwlet telewideniýesi ýurduň dolandyryjy maşgalasynyň täze ýyl belleýşini, olaryň täze ýyl saçagyny görkezdi.
Azatlyk Radiosy talyplara ýazdyrylýan dilhatylar we baýramçylyk gadaganlyklary barada ýurduň Bilim ministrliginden resmi teswir alyp bilmeýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum