Polisiýa işgärleri köçe söwdagärlerini köçelerden kowýar

Mary welaýatynyň Baýramaly etrabynda polisiýa işgärleri 17-nji aprelde irden köçe söwdagärlerine garşy reýd geçirdi. Polisiýa işgärleri esasan zenanlardan ybarat bolan satyjylaryň bikanun söwda bilen meşgullanýandyklaryny aýdyp, olardan köçeleri terk etmegi talap etdi. Ownuk söwda bilen meşgullanýan satyjylar ýurtdaky ýaramaz durmuş-ykdysady şertlerden we giň ýaýran işsizlikden şikaýat edip, polisiýa işgärlerine garşy çykdy. Ýagdaýyň ýitileşmegi bilen polisiýanyň we köçe satyjylarynyň arasynda dawa-jenjel ýüze çykdy, yz ýany, bir zenan satyjynyň saglyk ýagdaýy ýaramazlaşdy. Ýygnananlar ‘tiz kömek’ çagyrdy, bu aralykda, polisiýa işgärleri wakanyň bolan ýerini gyssagly terk etdi. Bu barada Azatlyk Radiosynyň habarçysy sebitden habar berýär.