Türkiýäniň wise-prezidenti Fuat Oktaý türkmen tebigy gazyny Türkiýä eltmek üçin üç wariantyň işlenip düzülýändigini we bu ugurdaky taýýarlyk işleriniň tamamlanyp barýandygyny aýtdy diýip, azeri mediasy habar berýär.
“Biz üç alternatiwanyň - Hazar arkaly TANAP liniýasynyň, SWAP ylalaşygyny ýa-da deňiz arkaly turba geçirijisini ulanmagyň üstünde işleýäris. Taýýarlyk işleriniň tamamlanmagyna gaty golaý gelendigimizi aýtmaga şatdyryn” diýip, “Anadolu” habar gullugy onuň sözlerine salgylanýar.
Oktaý Türkmenistanyň prezidenti Serdar Berdimuhammedowyň çalt netije gazanylmagy üçin çynlakaý goldaw berýändigini aýtdy diýip, habarda bellenilýär.
Azatlygyň ozal habar berşi ýaly, Fuat Oktaý 1-nji iýulda Aşgabatda Türkmenistanyň prezidenti bilen duşuşyp, oňa Türkiýäniň prezidenti Rejep Taýyp Erdoganyň sapara gelmek baradaky çakylygyny gowşurdy.
Bu duşuşyk türkmen lideriniň we öňki prezident Gurbanguly Berdimuhamedowyň birden birnäçe türk işewüri, şol sanda ozal türkmen hökümeti bilen 'oňuşmandygy' belli bolan "Polimeks' kompaniýasynyň başlygy Erol Tabanja bilen duşuşyp, täze hyzmatdaşlyk maslahatlartyny eden wagtynyň yz ýanyna gabat geldi.