Bakan welaýatynyň Türkmenbaşy şäherinde sarp edilen elektrik energiýasynyň degişli töleglerini geçirmedik hojalyklaryň üpjünçiligi kesilýär. Şol bir wagtda, jemagat hojalyklary güýz-gyş ýyladyş möwsüminiň öň ýany, ýyladyş gazanlaryny abatlamak üçin we beýleki abatlaýyş işleri üçin hojalyklardan 100 manat möçberinde öňünden pul toplaýar. Bular barada Azatlyk Radiosynyň habarçysy 27-nji sentýabrda sebitden maglumat berdi.
Türkmenistanda dowam edýän ykdysady kynçylyklaryň arasynda has köp hojalyklaryň hojalyk hyzmatlarynyň, şol sanda tok, gaz we suw üpjünçiliginiň aýlyk töleglerini geçirmekde kösenýändikleri barada habarlar gowuşýar.
“Geçen hepdäniň dowamynda, elektrik energiýasynyň we beýleki hojalyk hyzmatlarynyň bergisi 2 müň manatdan aşan 147 hojalygyň elektrik liniýasy kesildi. Töleglerini geçirmedik hojalyklara 1-nji oktýabra çenli möhlet berildi” diýip, bir üpjünçilik kärhanasynyň hünärmeni Azatlyk Radiosynyň habarçysyna gürrüň berdi.
Maglumata görä, şäher elektrik üpjünçilik kärhanasy karzlaryny berlen möhlete çenli wagtynda geçirmedik hojalyklara goşmaça jerime töleglerini töletdirmek haýbaty bilen duýduryş berýärler.
Degişli maglumat Mary: Köp sanly hojalyklar tok, gaz we suw töleglerini töläp bilmeýärŞu günler ýurduň dürli sebitlerinde elektrik we gaz üpjünçilik kärhanalary ilat tarapyndan sarp edilen energiýa serişdeleriniň töleglerini ýygnamak işlerini batlandyrýarlar.
Azatlyk Radiosynyň habarçysy bilen gürrüňdeş bolan şäher elektrik üpjünçilik kärhanasynyň işgäri tomus aýlarynda esasan elektrik energiýasynyň bergileri üýşen hojalyklaryň köpdügini aýdýar.
Türkmenistanda 2019-njy ýylyň 1-nji ýanwaryndan başlap, ozal ilata mugt berlen tok, gaz we suw ýaly ýeňillikler tölegli edildi. Türkmen hökümeti hojalyk hyzmatlarynyň tölegli görnüşe geçirilmegini ilatyň hal-ýagdaýynyň gowulanmagy bilen hem-de bazar ykdysadyýetiniň talaplary bilen düşündirdi. Bu aralykda, ýurt boýunça hojalyklara sarp edilen elektrik energiýasynyň we tebigy gazyň mukdaryny ölçeýji enjamlary oturtmak işlerine bat berlipdi.
Ýurtda ykdysady kynçylyklar dowam edýän wagtynda girizilen tölegler köp sanly eli ýuka hojalyklar üçin goşmaça agram saldy.
Azatlyk Radiosynyň Mary welaýatyndaky habarçysy geçen hepdede bu sebitde hem hojalyk hyzmatlary üçin töleg ýygymlarynyň batlandyrylandygyny, köp sanly maşgalalaryň sarp edilen energiýa serişdeleri üçin töleglerini geçirmäge gurbunyň çatmaýandygyny habar berdi.
Bu aralykda, Türkmenbaşy şäherinde jemagat hojalyklary öňümizdäki güýz-gyş ýyladyş möwsümine taýýarlyk işlerine girişýärler. Munuň bilen baglylykda, şäherdäki käbir ýyladyş gazanlaryny hem-de gaz we elektrik geçirijilerini abatlamak göz öňünde tutulýar.
Azatlyk Radiosynyň sebitdäki habarçysy geçen hepdäniň dowamynda jemagat hojalyklarynyň işgärleriniň abatlaýyş işleri üçin her hojalykdan goşmaça 100 manat möçberinde pul toplamaga başlandygyny habar berýär.
Jemagat müdirlikleri şäheriň sekiz töweregi umumy ýyladyş gazanlarynyň abatlaýyş işlerine mätäçdigini aýdýarlar.
Degişli maglumat Aşgabatda hojalyk hyzmatlary üçin tölegleri geçirmedik raýatlara zerur resminamalar berilmeýärÝerli jemagat hojalyklary nobatdaky güýz-gyş ýyladyş möwsüminiň 10-njy oktýabrda resmi taýdan açylýandygyny we şoňa çenli abatlaýyş işlerini tamamlamagyň zerurdygyny aýdýarlar.
Türkmenistanyň şäher ýerlerinde esasan umumy ýyladyş ulgamlaryndan, etrap we oba ýerlerinde bolsa, özbaşdak ýyladyş ulgamlaryndan peýdalanylýar.
Habarçymyz bilen gürrüňdeş bolan jemagat müdirlikleriniň işgärleri Türkmenbaşy şäherinde hojalyklaryň diňe 20 göterimden gowragynyň öýleriniň umumy ýyladyşa birikdirilendigini, galan 80 göteriminiň özbaşdak ýyladyş ulgamlaryndan peýdalanýandyklaryny aýdýarlar.
Ilatyň elektrik energiýasy we tebigy gaz üpjünçiliginiň tölegli görnüşe geçirilmegi bilen, Türkmenbaşy şäherinde hojalyk hyzmatlary bilen üpjünçilik kärhanalary ilat arasynda öýlere oturdylan tok hasaplaýjylardan sowa geçip, elektrik energiýasyndan “ogryn” peýdalanýan hojalyklaryň ýüze çykarylýandygyny aýdýarlar.
Elektrik energiýasy bilen üpjünçilik kärhanasynyň bir hünärmeni şäher boýunça elektrik energiýasynyň üpjünçiliginde 70 göterim töweregi ýitginiň hasaba alnandygyny aýdýar.
Azatlyk Radiosy hojalyk hyzmatlarynyň ýagdaýy we ilatyň elektrik energiýasy we tebigy gaz bilen üpjünçiligi baradaky habarlar boýunça Türkmenbaşynyň şäher häkimliginden teswir alyp bilmedi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.