Täze ýyl baýramçylygynyň öňüsyrasynda, dekabr aýy ahyrlaýan mahaly, Mary welaýatynda býujet işgärleriniň zähmet haklary möhletinden öň tölenildi. Her bir býujet işgäriniň zähmet hakyndan welaýat merkeziniň “bezeg işlerine niýetlenilip”, 80 manat möçberinde pul tutulýar. Işgärler onsuz hem bazar sebedine gabat gelmeýän aýlyk töleglerinden pul tutulmagyna garşylyk beýan edýärler.
Azatlyk Radiosynyň habarçysy bilen gürrüňdeş bolan birnäçe býujet işgäri özleriniň zähmet tölegleriniň möhletinden öň bank hasaplaryna geçirilendigini tassykladylar. Şol bir wagtda, olar baýramçylygyň öňüsyrasynda, öz aýlyklaryndan “şäheriň bezeg işlerine niýetlenilip” 80 manat möçberinde artykmaç pul tutulmagyna garşylyk bildirýärler.
“Biziň aýlygymyzdan 80 manat pul tutýarlar. Şäheri bezejek bolsalar, býujet işgärlerinden pul tutmalymy? Biz onsuz hem bir aýdan beýleki aýa çenli pul artdyryp bilmeýäris. Şonda-da, bizden tutum tutýarlar. Gaýtam, baýramçylyk mynasybetli bize goşmaça bonus berilmeli” diýip, býujet işgäri aýdýar.
Sebit ýaşaýjylary öňler Täze ýyl baýramynda Kärdeşler arkalaşyklarynyň adyndan işgärlere gowşurylýan sowgatlary, höweslendirmeleri ýatlaýarlar.
Degişli maglumat Balkanyň birnäçe edara-kärhanasynda işgärleriň zähmet haklary gijikdirilýär“Öňler Kärdeşler arkalaşyklary her bir işgäre ýylda bir sapar sowgat bererdi. Iň bolmanda özümizde öndürilýän polotensalar, ýa-da çäýnek käseler gowşurylyp işgärler höweslendirilerdi” diýip, Mary şäheriniň bezeg işlerine 80 manat möçberinde goşant goşmaga mejbur edilen bir býujet işgäri aýdýar.
Birnäçe býujet işgäri, habarçylarymyz bilen gürrüňdeşlikde, özleriniň durmuş şertleriniň, maliýe-ykdysady mümkinçilikleriniň soňky döwürlerde barha agyrlaşandygyny aýdýarlar.
Türkmenistanda dowam edýän ykdysady kynçylyklar, harytlaryň yzygiderli gymmatlamagy durnukly girdeji çeşmesi bolan býujet işgärleriniň güzeran şertlerine-de agram salýar. Olar özleriniň aýlyk haklarynyň bazar sebedine gabat gelmeýändigini, öz girdejileriniň bazarlardaky bahalar bilen bäsleşip bilmeýändigini aýdýarlar.
Ýurtda iň pes aýlyk zähmet haky 2024-nji ýylyň 1-nji ýanwaryndan başlap, 1280 manat möçberinde bellenildi.
Habarçymyz bilen gürrüňdeş bolan bir býujet işgäri möhletinden öň geçirilen zähmet hakyny kabul edip, baýramçylyk mynasybetli öz çagasyna oýunjak satyn almak üçin pul artdyryp bilmeýändigini, muňa garamazdan, 80 manat möçberinde şäheriň bezeg işlerine goşant goşmaga mejbur edilýändigini gürrüň berdi.
“Biz onsuz hem bir aýlykdan beýleki aýlyga zordan ýetirinýäris” diýip, ol sözüniň üstüni ýetirdi.
Hojalyklar maliýe-ykdysady kynçylyklaryň arasynda özleriniň üpjünçilik ýagdaýynyň gowulanmaýandygyny, azyk howpsuzlygynyň durnukly berkidilmeýändigini gürrüň berýärler.
“Harytlaryň nyrhy edaradan alýan aýlygyňa gabat gelmeýär, gymmat. Adamlar indi gyş paslynda eşiklerini täzeläp bilmän, köne eşiklerine ýama ýamadyp geýip başladylar” diýip, bir sebit ýaşaýjysy aýdýar.
Degişli maglumat Maryda geçirilen mejbury çärede ‘aç’ talyplardan ýylgyrmak we şatlanmak talap edildiBu aralykda, hökümetçi neşirler Täze ýyl baýramynyň öňüsyrasynda, ýurduň bazarlarynda we dükanlarda azyk bolçulygynyň döredilendigini habar berýärler.
Zähmet haklaryny öňünden kabul eden maryly býujet işgärleri üpjünçilik aladalaryna gümra bolup, özleriniň aýlyk haklaryndan tutulýan tutumlary ara alyp maslahatlaşýarlar.
Olar welaýatda şu ýyl pagta möwsümi mynasybetli pul tutulmagynyň bes edilmegine ilkibaşda begenendiklerini aýdyp, bu ýagdaýyň uzaga çekmändigini belleýärler.
Ýatlasak, şu ýylyň sentýabr aýynda Mary welaýatynda býujet işgärleri mejbury pagta ýygmakdan boşadylyp, olardan ýygym möwsümi bilen baglylykda goşmaça pul tutulmagy hem bes edilipdi. Ýöne Azatlygyň habarçylary 13-nji dekabrda sebitde gowaça meýdanlaryny arassalamak üçin býujet işgärlerinden ýene pul serişdeleriniň ýygnalyp başlanandygyny habar berdi.
“Mary welaýatynda býujet işgärleri pagta möwsümine degişli tutumlar togtadylanda begenipdi, ýöne, gynansak-da, bu uzaga çekmedi” diýip, bir býujet işgäri aýtdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.