Balkan welaýatynda soňky üç hepdäniň dowamynda Internet aragatnaşygynyň tizligi yzygiderli peselýär, VPN hyzmatlary petiklenip başlandy diýip, ýerli ýaşaýjylar aýdýar.
Bu aralykda, ulag we aragatnaşyk kärhanalarynyň ýerli şahamçalary işgärleriň arasynda 'köpçülikleýin häsiýete eýe bolup barýan iş taşlamak meýilleriniň' fonunda, boş iş orunlary boýunça onlaýn bildirişlerini ýygjamlaşdyrdylar.
“Super VPN, Potato VPN we Panda VPN ýaly öňler işläp duran wirtual şahsy torlar yzly-yzyna petiklenip başlandy, häzirki wagtda sanlyja VPN işleýär” diýip, sebit ýaşaýjysy aýdýar.
Degişli maglumat Lebapda we Aşgabadyň käbir etraplarynda internet birnäçe sagatlap petiksiz işlediWelaýat ýaşaýjylary 6 Mb/s tizlik wada berýän nyrhnamalaryň häzirki wagtda 512 Kb/s tizlik hödürleýändigini, 2 Mb/s tizlik bilen işleýän öý Internetiniň tizliginiň bolsa, tas 100 Kb/s-a aşaklandygyny aýdýarlar.
Şol bir wagtda, “Altyn Asyr” öýjükli aragatnaşyk kärhanasynyň hödürleýän mobil Internetiniň 4G ulgamy hem 2G ulgamyna çenli aşaklapdyr.
Türkmenbaşy şäherinde Azatlyk Radiosynyň habarçysy bilen gürrüňdeş bolan bir aragatnaşyk hünärmeni Internet ulgamynyň “nurbatlarynyň ýokardan towlanandygyny” aýdýar.
“Telekom Internet paýlanyşygynyň tizligini merkezden peseltdi” diýip, ol döwlet eýeçiligindäki 'Türkmentelekom' elektrik aragatnaşyk kärhanasyny göz öňünde tutup aýdýar.
Hünärmen halkara aragatnaşyk torunyň gysylmagyny sebitde durmuşa geçirilýän Täze ýyl çäklendirmeleriniň bir bölegi hasaplaýandygyny aýdýar.
Türkmenistanda häkimiýetler iri baýramçylyklaryň öňüsyrasynda raýatlara gözegçilik işlerini güýçlendirýärler.
Sebitde öý Interneti “Türkmentelekom” aragatnaşyk kärhanasynyň “Balkantelekom” şahamçasy tarapyndan üpjün edilýär.
Döwlet aragatnaşyk kärhanasy ilat üçin 1 Mbit/s-dan 6 Mbit/s-a çenli Internet nyrhnamalaryny hödürleýär. Bu tarifleriň tölegleri degişlilikde aýda 150 – 280 manat aralygynda üýtgeýär.
“Altyn Asyr” mobil operatory öz müşderilerine 50 MB-dan 20 GB-a çenli Internet bukjalaryny hödürleýär. 50 MB-lik bukja 3 manat, 20 GB-lik bukja 200 manat.
Balkanly ýaşaýjylar “Altyn Asyr” kärhanasynyň soňky alty aý bäri bu sebitde SIM kartlaryny bermegi bes edendigini aýdýar.
Türkmenistan öňki ýyllarda öz raýatlaryna iň gymmat bahaly we iň pes tizlikli Internet mümkinçiliklerini hödürlemekde öňe saýlandy.
Bu ýagdaýa ünsi çekýän halkara hasabatlaryň yz ýany, häkimiýetler 2023-nji ýylyň başlarynda Internetiň tizligini 6 Mb/s-a çenli ýokarlandyrdylar.
Şol bir wagtda, soňky ýyllarda aragatnaşyk infrastrukturalary hem täzelenip, Azatlyk Radiosynyň habarçylary ýurt içinde GPON ulgamlarynyň ornaşdyrylmagynyň hem giňe gerime eýe bolýandygyny habar berdiler.
GPON tehnologiýasy ornaşdyrylanda optiki süýümli kabeller çekilip, maglumatyň geçirijiligi ýokarlanýar.
VPN ulgamlary hem türkmen ulanyjylarynyň arasynda uly islegden peýdalanýan onlaýn harytlaryň hatarynda gelýär.
Degişli maglumat Balkanda SIM kartalary satylmaýar, Aşgabatda we Türkmenabatda internet haýalladyÝatlasak, Türkmenistan 2023-nji ýylda Google gözleg hereketlendirijisi arkaly Internetden VPN gözlemekde dünýäde birinji orny eýeledi.
Häkimiýetler Internet ulgamyndaky maglumat çeşmelerini çäklendirip, raýatlaryň maglumat azatlygyny gysmakda tankyt edilýär.
Media azatlygy boýunça halkara hasabatlarda hem bu ýurt yzdaky orunlary eýeleýär.
Bu aralykda, ulag we aragatnaşyk kärhanalarynyň ýerli şahamçalary soňky wagtlarda boş iş orunlary boýunça has köp bildiriş berip başlady.
Ýurduň iň iri onlaýn bildiriş platformalarynda “Türkmentelekom”, “Demirýollary” we Altyn Asyr" öýjükli aragatnaşyk kärhanasy ýaly ulag we aragatnaşyk kompaniýalarynyň Balkan welaýatyndaky şahamçalarynyň goýýan bildirişlerine soňky wagtlarda ýygy-ýygydan duş gelmek mümkin diýip, ýerli ýaşaýjylar aýdýar.
Azatlyk Radiosynyň habarçysy bilen gürrüňdeş bolan aragatnaşyk hünärmeni 2024-nji ýylda bu pudakda ençeme hünärmeniň öz işini taşlap, has oňat durmuş şertleriniň gözleginde daşary ýurtlara çykandygyny aýdýar. Ol bu pudagyň işgär sanynyň üstümizdäki ýylda 50 göterim çemesi azalandygyny aýtdy.
Azatlyk Radiosy bu maglumatlar boýunça ýerli resmilerden teswir alyp bilmeýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.