5-nji awgustda prezident Serdar Berdimuhamedow Awaza zolagyna bardy. Munuň bilen bagly, kurort şäherinde we onuň töweregindäki sebitlerde hereket çäklendirildi, howpsuzlyk çäreleri güýçlendirildi. Şeýle-de, emeldarlaryň aýlanaýjak ugurlary boýunça dynç alýan kişi bolýan aktýorlar ýerleşdirildi.
“[Şenbe güni] ir bilen Türkmenbaşy şäherinden Awaza gatnaýan awtobuslaryň we taksileriň hereketi çäklendirildi. Kongresler merkezinden ýahta klubuna çenli hiç kime görünmezlik tabşyryldy. Ýahtalary arenda bermek hem gadagan edildi. Raýat eşikli, eli rasiýaly MHM işgärleri myhmanhanalara ýerleşdiler” diýip, ýerli ýaşaýjylaryň biri habarçymyza gürrüň berdi.
Degişli maglumat Türkmenbaşydan içerki migrantlar, Hazardan dynç alýanlar kowulýarOl prezidentiň şol gün “Awazada” welosipetli syýahat edendigini, kottejler toplumyny synlandygyny, emeldarlar bilen ýahtada aýlanandygyny hem mälim etdi.
“Şol gün myhmanhanalardan hiç kimi daşyna çykarmadylar. Adaty adamlara derek, hamala dynç alýan kişiler bolýan, öňünden taýýarlanyp goýlan adamlaryň toparyny goýberdiler. Deňizde aýal maşgalalar doly ýapyk lybasda, erkekler hem şortyly suwa düşdüler” diýip, söhbetdeşimiz aýtdy. Bellesek, aýal-gyzlaryň daşky keşbine çäklendirmeleri giriziýän türkmen häkimiýetleri, zenanlaryň bikini-kupalniklerde suwa düşmegini hem gadagan edipdi.
Ýurduň ýolbaşçy düzümi 1-nji awgustdan 1-nji sentýabra çenli dynç alşa goýberildi.
Azatlyk geçen aýyň aýagynda Awazada munuň bilen bagly uly taýýalyk görülýändigini habar beripdi. Bularyň çäginde, eýýäm adata öwrülen mejbury ýowarlar geçirildi, howpsuzlyk çäreleri güýçlendirildi.
Myhmanhanalarda dynç almaga gelen raýatlaryň resminamalary içgin öwrenildi we olar “üç arka” barlagyndan geçirildi.
Azatlyk bular barada welaýat häkimliginden we myhmanhanalardan kommentariýa alyp bilmedi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.