6-njy fewralda günorta-gündogar Türkiýede we Siriýada bolan 7,8 kuwwatlygyndaky ýer titremesi ýüzlerçe binany ýumrup, gyşyň aňzakly gijesinde dowla düşen ýaşaýjylary daşaryk çykardy.
Türkmenistanlylaryň zähmet migrasiýasy we ýokary bilim üçin iň köp ýykgyn edýän ýurtlarynyň biri bolan Türkiýedäki bu tebigy betbagtçylykda türkmen raýatlarynyň arasynda zyýan çekenleriň bardygy ýa ýokdugy barada häzirlikçe maglumat ýok.
Türkiýede we Siriýada azyndan 1300 adam öldi, ýüzlerçe adam ýaralandy we başga-da ýüzlerçe adamyň henizem harabalygyň astynda galandygy çak edilýär.
Halas ediş işgärleri we ýaşaýjylar serhediň iki tarapyndaky birnäçe şäherde ýykylan binalaryň harabalygynyň arasynda diri galanlary gözleýärler. Ejir çekenleriň sanynyň artmagyna garaşylýar.
Degişli maglumat Türkiýede türkmen zenany bäbegini penjireden zyňdy. Ol özüne bildirilýän aýyplamany ret edýärABŞ-nyň Geologiýa Gözleg gullugynyň maglumatyna görä, 7,8 bal derejesindäki ýer sarsgyny Kair ýaly uzakda ýerleşýän şäherde hem duýuldy.
Gyşyň aňzakly gijesinde bolan ýer titremesiniň ojagy Türkiýäniň Gaziantep şäheriniň demirgazygynda, Siriýa serhedinden 90 km uzaklykda ýerleşýär.
Azatlyk Radiosynyň Türkiýedäki habarçysy ýer titremesiniň esasan Kahramanmaraş, Gaziantep, Malatýa, Batman, Bingöl, Elazig, Kidis, Diýarbakir, Mardin, Siirt, Şirnak, Wan, Muş, Bitlis, Hakkari, Adana, Osmaniýe we Hataý ýaly şäherlerde güýçli duýlandygyny aýdýar.
"Sebit häkimiýetleriniň maglumatyna görä, ölenleriň sany 1014 adam ýetdi. Betbagtçylyklar we adatdan daşary ýagdaýlar boýunça gullugyň habaryna görä, sebitde 2 müň 824 bina ýumruldy" diýip, habarçy aýtdy.
Türk metbugat serişdelerinde we sosial ulgamlarda peýda bolan wideolaryň käbirinde ýer titremesinde yzly-yzyna duran üç sany köp gatly binanyň birnäçe sekundyň dowamynda ýumrulýandygyny, dowla düşen adamlaryň aeroportlardan, hassahanalardan gyssagly çykýandygyny görse bolýar.
Türkiýe türkmenistanlylaryň zähmet migrasiýasy we ýokary bilim üçin iň köp ýykgyn edýän ýurtlarynyň biri hasaplanýar.
Degişli maglumat THF türkmen resmilerini deportasiýa merkezlerindäki türkmenleriň ýagdaýyna üns bermäge çagyrýarTürk häkimiýetleriniň 19-njy ýanwarda çap eden soňky maglumatyna görä, Türkiýede 221 müňden gowrak türkmenistanly kanuny rugsat bilen ýaşaýar. Resmi däl çeşmeler Türkiýedäki türkmenleriň umumy sanynyň, şol sanda bikanun ýaşaýan türkmenistanlylaryň resmi sanlardan ençeme esse ýokarydygyny çaklaýarlar.
Tebigy betbagtçylykda türkmen raýatlarynyň arasynda zyýan çekenleriň bardygy ýa ýokdugy barada häzirlikçe maglumat ýok.
Ýöne ýer titremesiniň güýçli duýlan şäherlerinde, hususan-da Gaziantepde we Kahramanmaraşda türkmenistanly studentleriň onlarçasy ýokary bilim alýar.
6-njy fewralda Azatlyk Gaziantebiň we Kahramanmaraşyň ýokary okuw jaýlarynda okaýan aýrybaşga iki türkmenistanly student bilen habarlaşmaga çalyşdy. Ýöne redaksiýanyň ýerli wagt bilen ikindin sagat 4-e çenli eden synanyşyklary netijesiz boldy.
Adatça bolşy ýaly Türkmenistanyň berk döwlet gözegçiligindäki metbugat serişdelerinde Türkiýede bolan tebigy betbagtçylyk barada hiç zat aýdylmaýar. Türkmen häkimiýetleri adatça şeýle betbagtçylyklaryň yz ýany, degişli ýurduň hökümet ýolbaşçylaryna gynanç hatyny ibermek bilen çäklenýärler.
Degişli maglumat Türkiýede türkmen migrantlary iş orunlaryny ‘köpçülikleýin’ ýitirýärlerGadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.