Şu günler Lebap welaýatynyň Türkmenabat şäherinde grip-dümew alamatlary bilen keselleýän adamlar köpelýär. Hassahanalarda we saglyk öýlerinde derman tapdyrmaýar. Raýatlar döwlet dermanhanalarynyň dermanlarynyň hususy dermanhanalardakydan has gymmatdygyny aýdýarlar.
"Dümewlän raýatlar köplenç maşgala lukmanlaryna ýüz tutýarlar. Şäherdäki Saglyk öýleriniň altysynda we olaryň şahamçalarynyň bäşisinde syrkaw adamlaryň juda köpdügini synlasa bolýar. Adamlar 85 manat töläp, analiz tabşyrýarlar. Lukmanlar näsaglara ýazyp beren dermanlaryny golaýdaky döwlet dermanhanasyndan almagy maslahat berýärler. Olar munuň sebäbini saglyk öýünde dermanyň gutarandygy bilen düşündirýärler" diýip, habarçy aýtdy.
Döwlet dermanhanasyna baran raýatlar, lukmanyň görkezmesiniň bardygyna garamazdan, dermanlary doly bahasyndan satyn almaly bolýarlar.
Degişli maglumat Howanyň temperaturasy rekord derejelere peselýärkä, dümewleýänler köpelýär"Döwletiň saglyk ätiýaçlandyryş şahadatnamasy hiç hili ýeňillik döretmeýär. Lukmanyň görkezme hatynyň bardygyna garamazdan, hemme dermanyň we sanjymyň bahasyny doly alýarlar" diýip, ýerli ýaşaýjy aýtdy.
Üstesine-de, döwlet dermanhanalary dermanlary has gymmatdan satýarlar. Ýaşaýjy döwlet dermanhanasynda 800 manat baha kesilen dermanlary hususy dermanhanadan 620 manada alandygyny hem belledi.
"Gara bazarda dollar arzanlap başlasa, hususy dermanhanalardaky dermanlaryň bahasy ýuwaş-ýuwaşdan arzanlaýar. Ýöne döwlet dermanhanalarynda şol bir nyrh saklanýar" diýip, habarçy aýtdy.
Häzirki wagtda dümewlän raýatlaryň bäş günlük dermanlary we sanjymlary tas 1 müň manada barabar bolýar. Bu çykdajylar ykdysady kynçylyklar sebäpli gurpdan düşen köp maşgala agram salýar.
Türkmen häkimiýetleri we döwlet gözegçiligindäki media serişdeleri ýokarda beýan edilen ýagdaýlar barada aç-açan maglumat bermeýärler. Azatlygyň bu barada Lebabyň saglyk bölüminden kommentariýa almak synanyşyklary hem netije bermedi.
Degişli maglumat Darganatada aşa sowuk howa ilatyň gazynyň we suwunyň kesilmegine getirdiSoňky günlerde Türkmenistanyň dürli künjeginde grip-dümew alamatlary bilen keselleýän adamlar göz-görtele köpelýär, dermanhanalarda adamlaryň uly nobatlary döreýär. Bu waka Türkmenistana, hususan-da ýurduň demirgazyk we gündogar sebitlerine aşa sowuk howanyň aralaşan mahalyna gabat geldi.
Howa maglumatlaryny çap edýän "Weather.com" neşiriniň maglumatyna görä, 9-njy dekabrda Türkmenabatda howanyň temperaturasynyň gündiz 2 we gije -10 gradus bolmagyna garaşylýar.
Bu aralykda, Aşgabatdaky habarçylarymyz paýtagtda howanyň temperaturasynyň klimat normalarynda saklanýandygyny aýdýarlar. 9-njy dekabrda Aşgabatda howanyň temperaturasynyň gündiz 2, gije -4 gradus bolmagyna garaşylýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.