Ukrainanyň prezidenti Wolodymyr Zelenski öz ýurdunyň Russiýa bilen aradaky urşy bes etmegi üçin islendik kepilligiň diňe ABŞ tarapyndan üpjün edilen halatynda manyly boljakdygyny, 20-nji ýanwarda geçirilmeli kasam kabul ediş dabarasyndan soň kän wagt geçmänka, saýlanan prezident Donald Tramp bilen duşuşmak isleýändigini aýtdy.
"ABŞ-syz howpsuzlyk kepillikleri mümkin däl" diýip, ol 5-nji ýanwarda ABŞ-ly podkastçy Leks Fridman bilen geçirilen üç sagatlyk söhbetdeşlikde aýtdy.
"Men rus agressiýasynyň öňüni alyp biljek howpsuzlyk kepilliklerini göz öňünde tutýaryn" diýip, Zelenski aýtdy.
Kiýewde iňlis, ukrain dillerinde we hatda käte rus dilinde geçirilen söhbetdeşlikde Zelenski Kiýew üçin howpsuzlyk kepilligi bolmazdan islendik ýaraşygyň Kreml tarapyndan gaýtadan güýç toplamak we täze hüjüm üçin ulanyljakdygyna ynanýandygyny aýtdy.