Türkmenistanda welaýatlaryň arasynda gatnaýan ýolagçy otlularynyň arassaçylyk şertleri raýatlary kanagatlandyrmaýar. Bu barada Azatlyk Radiosynyň habarçysy 9-njy dekabrda maglumat berdi.
“Otlulardaky oturgyçlar we ýatylýan düşekler tagtabitinden dolupdyr. Mör-möjekler ýolagçylaryň el goşlaryna, egin eşiklerine ýapyşyp, adamlar bilen bilelikde sebitleriň arasynda ýaýraýar” diýip, birnäçe türkmenistanly Azatlyk Radiosynyň habarçysy bilen gürrüňdeşlikde aýtdy.
Bu transport serişdesinden dowamly peýdalanýan raýatlar soňky wagtlarda plaskart we kupe wagonlaryndaky düşeklerde mör-möjekleriň köpelendigini aýdýarlar.
“Adamlar öz öýlerine, şeýle-de myhmançylyga barýan ýerlerine bit daşaýarlar” diýip, ýolagçylar aýdýar.
Türkmenistanda otly hyzmatlary “Demirýollary” açyk görnüşli paýdarlar jemgyýeti tarapyndan ýerine ýetirilýär.
Ýurduň demir ýol ulaglary pudagyna “Türkmendemirýollary” agentligi gözegçilik edýär.
Azatlyk Radiosy bu edaralaryň hiç haýsyndan degişli maglumatlar boýunça resmi teswir alyp bilmeýär.
Ýöne ýolagçy otlularynyň arassaçylyk şertleri bilen bagly habarlar demir ýol infrastrukturasynyň hili bilen bagly aladalaryň ýygjamlaşýan pursatlaryna gabat gelýär.
Ýaňy-ýakynda ýurduň demir ýol ulgamlarynyň käbir bölekleriniň çat açan suratlary sosial ulgamlarda paýlaşylyp, raýatlar tarapyndan ara alnyp maslahatlaşyldy.
“Raýatlar suratlary paýlaşmak bilen, pudaga gözegçilik edýän döwlet emeldarlarynyň ünsüni çekmäge çalyşýarlar. Olar pajygaly wakalar bolmazdan öň, häkimiýetler bularyň öňüni alar diýip umyt edýärler” diýip, şonda paýtagtly ýaşaýjy anonimlik şertinde Azatlyk Radiosynyň habarçysyna gürrüň berdi.
Şeýle problemalar esasan çet sebitlerde göze ildi, ýöne habarçylarymyz çat açan demir ýol ulgamlarynyň paýtagta golaý ýerlerde hem göze dürtülýändigini aýtdylar.
“Otlularyň içini dezinfeksiýa etmek üçin, ýagny zyýansyzlandyrmak üçin arassaçylyk serişdelerini bölüp bermeýärler” diýip, bir demir ýol pudagynyň işgäri aýdýar.
Ol otlulardaky tagta bitlerini ýok etmek üçin öz mümkinçilikleriniň çäkli bolandygyny aýdýar.
Azatlyk Radiosynyň habarçysy bilen gürrüňdeş bolan ýolagçylaryň birnäçesi demir ýol pudagynyň käbir işgärleriniň bu ýagdaýlar sebäpli hatda öz garyndaşlaryna demir ýol hyzmatlaryndan peýdalanmazlygy maslahat berýändiklerini aýdýarlar.
Redaksiýa bu maglumatlar boýunça hem transport resmilerinden goşmaça maglumat alyp bilmeýär.
Türkmenistanda soňky bir ýyldan gowrak wagt bäri tagtabiti ýaýrap, paýtagt Aşgabadyň hem-de sebitleriň ýaşaýjylary gan sorujy mör-möjeklerden ejir çekdi.
Tagta bitleri geçen ýylyň sentýabr aýynda paýtagtyň myhmanhanalarynda hem peýda bolup başlady. Noýabr aýynda çagalar baglarynda tagtabitine garşy göreşmek üçin ene-atalardan pul serişdeleri ýygnalyp başlandy.
Köp gatly jaýlarda tagtabitini ýok etmek hyzmatlaryny hödürleýän mahabatlar goýuldy. Azatlyk Radiosynyň habarçylary dekabr aýynda bu jandarlaryň Balkan welaýatyna aralaşandygyny habar berdiler. Şonda döwlet arassaçylyk we keselleriň ýaýramagyna garşy göreş gullugy Awazanyň myhmanhanalarynda zyýansyzlandyrma işlerine girişdiler.
Tomus aýlarynda Aşgabatda tagtabiti ýene köpelip başlady, munuň yz ýany, sentýabr aýynda Türkmenbaşyda we Awazada tagtabitine meňzeş mör-möjekler ýaýrap başlady.
Aradan üç aý çemesi wagt soň, ýerli ýaşaýjylar zyýanly mör-möjekleriň ýolagçy otlularynyň üsti bilen hem welaýatlaryň arasynda ýaýraýandygyny aýdýarlar.
Demir ýol pudagynyň beýleki bir işgäri Azatlyk Radiosynyň habarçysy bilen anonim söhbetdeşlikde ýolagçy otlularynda diňe bir tagtabitiniň däl, eýsem, kesel ýaýradyjy syçanlaryň, alakalaryň we saçakçylaryň hem bardygyny aýdýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum