Rus goşunynyň generaly Sergeý Surowikin hususy eýeçilikdäki harby toparyň, “Wagneriň” ýolbaşçysy Ýewgeniý Prigožiniň Russiýanyň ýokary harby serkerdeligine garşy çykmak baradaky planlaryndan habarlydy diýip, "New York Times" gazeti amerikan aňtaw gullugynyň ýagdaýy bilýän çeşmelerine salgylanyp habar berýär.
Gazetiň ýazmagyna görä, bu maglumatlardan Surowokiniň Prigožine hakyna tutulan söweşijileriň ýörişini planlaşdyrmaga kömek edendigi ýa-da däldigi belli däl.
Wagnerçiler ýöriş wagtynda Günorta Harby okrugyň merkeziniň ýerleşýän şäherini, Don boýundaky Rostowy gözegçilik astyna aldy we goranmak ministri Sergeý Şoýgunyň, Baş ştabyň başlygy Waleriý Gerasimowyň wezipelerinden boşadylmagyny talap etdi.
ABŞ resmileri ýurduň harby ýolbaşçylarynyň güýç bilen çalşyrylmagy boýunça edilen synanyşygy birnäçe rus generalynyň goldandygyny görkezýän başga alamatlar barada hem habar berdiler.
ABŞ-nyň häzirki we öňki resmileriniň aýtmaklaryna görä, häkimiýet başyndaky beýleki adamlaryň özüni goldajakdygyna ynanmadyk ýagdaýynda, Prigožin beýle pitnä baş goşup bilmezdi diýip, gazet belleýär.
Surowikin geçen ýylyň oktýabr aýyndan şu ýylyň ýanwar aýyna çenli Ukrainada söweşýän rus goşun toparynyň serkerdesi boldy. Şu ýylyň ýanwar aýynda, bu wezipä Waleriý Gerasimow belleneninden soň, Surowikin onuň orunbasary boldy. Sergeý Surowikin bäşinji gün "Wagner" söweşijilerine pitneden saklanmak baradaky wideo çagyryşy bilen ýüzlendi.