Maryda mollalar we ýaşulular raýatlara Palestinada urşuň dowam edýändigini we onda ölýänleriň "ählisiniň musulmanlardygyny" aýdyp, raýatlara olaryň hatyrasyna sadaka bermegi wagyz edýärler. Şol bir wagtda, sebitiň hukuk goraýjy edaralarynyň işgärleri raýatlary urşa üns bermezlige çagyrýarlar.
“Mollalar we ýaşulular bu baradaky wagyzlaryny metjitlerde we pata, toý, sadakalarynda edýärler. Olar sadaka bereliň, her namazymyzda, aýat-töwwirimizde dileg edeliň, dünýäniň ýüzünde parahatçylygyň bolmagyny, ölüm-ýitimiň azalmagyny diläliň diýýärler” diýip, Azatlyk Radiosynyň habarçysy 30-njy oktýabrda habar berdi.
Üýşmeleňlerde adamlar mollalardan we ýaşululardan Ysraýyl-Palestina urşunda kimiň günälidigi baradaky soraglary hem berýärler.
“Olar adamlara: ‘Biz kimiň günälidigini, kimiň günäsizdigini bilmeýäris. Biz bir zady bilýäris: uruş gowy zat däl. Islendik ýurtda uruş gitse, şonda kän bigünä adam ölýär. Biz ähli adamlar üçin diňe doga-dileg edip, sadaka berip bilýäris’ diýýärler” diýip, habarçymyz aýtdy.
Hamas toparynyň 7-nji oktýabrda Ysraýylyň günortasyndaky şäherlere eden ýykgynçylykly hüjüminde 1400-den gowrak adam ölenden we başga-da 200-den gowragy ýesir alnandan soň, Ysraýyl 2,3 million ilatly Gazanyň daşyny gabap, howa hüjümlerine başlady we ölenleriň sany müňlerçe adama ýetdi.
Mollalaryň we ýaşulularyň wagyzlarynyň arasynda, hukuk goraýjy edaralaryň işgärleri urşuň “ýokardaky görünmeýän adamlar” tarapyndan ýörite gurnalýandygyny aýdyp, raýatlary urşa üns bermezlige çagyrýarlar.
“Hukuk goraýjylar Palestinadaky uruş barada gürrüň eden adamlara telewizorda we Internetde uruş baradaky maglumatlary ýaýradyp, oňa köp adamy çekjek bolýarlar hem diýýärler. Sadaka bermek isleseňiz, dilegçi göreniňizde 1 manat beräýmeli, beýdip adam baryny üýşürip oturmagyň geregi ýok diýýärler” diýip, ýagdaýlardan habarly çeşmämiz gürrüň berdi.
Azatlyk bu aýdylanlar barada sebitiň kanun goraýjy edaralaryndan we din işleri boýunça edarasyndan kommentariý alyp bilmedi.
Habarçymyzyň we çeşmämiziň tassyklamagyna görä, Maryda ilatyň köp bölegi uruş barada hiç zat bilmeýändigini aýdýar. Şol bir wagtda, marylylaryň arasynda urşuň tiz gutarmagyny diläp, nahar bişirip, sadaka edýänler ýa-da hudaýýoly paýlaýanlar hem bar.
“Köp adam urşuň barýandygyny şol berilýän we paýlanýan sadakalardan bilip galýar. Olar özleriniň diňe Russiýa-Ukraina urşundan habarlydyklaryny aýdýarlar” diýip, çeşmämiz belledi.
Şol bir wagtda, habarçymyz adamlaryň arasynda, ugradyp bolýan bolsa, artyk egin-eşikleri, aýakgaplary, ýorgan-düşekleri, un, çörek, suw we süýji-köke ibermek isleýänleriň bardygyny hem aýdýar.
Dünýäniň iň bir ýapyk we repressiw ýurtlarynyň biri hasaplanylýan Türkmenistanyň ýolbaşçylary adatça bolşy ýaly Ysraýyl-Palestina konflikti barada häzire çenli kelam agyz söz aýtman gelýär.
Ýöne 27-nji oktýabrda Marynyň Gurbanguly hajy metjidiniň mollasy dünýäniň dürli künjeginde uruşlaryň dowam edýändigine ünsi çekip, juma namazyny okamaga baran adamlary daşary döwletlerde okaýan ýa işleýän çagalaryna gözegçiligi güýçlendirmäge çagyrdy. Ol çagalar uruş bilen bagly wakalara goşulsa, onda olaryň “ilki öz aýaklaryna, soňra-da ene-atasynyň aýagyna palta urjakdygyny” aýtdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum