Şenbe güni, 23-nji noýabrda geçirilen Stambul energetika forumynyň çäklerinde, “Türkmengaz” döwlet konserniniň başlygy Maksat Babaýew Türkiýäniň energetika ministri Alparslan Baýraktar bilen duşuşdy diýip, “Biznes Türkmenistan” neşiri habar berýär.
Neşiriň maglumatyna görä, taraplar Türkiýäniň BOTAS we TPAO döwlet kompaniýalarynyň Türkmenistanyň nebit-gaz ýataklarynda bilelikdäki taslamalary durmuşa geçirmek mümkinçiliklerine seretdiler.
Şeýle-de, olar nebit-gaz ulgamyndaky ikitaraplaýyn hyzmatdaşlygy giňeltmek, türkmen gazyny Türkiýäniň üstünden Ýewropa ibermegiň goşmaça ugurlary barada pikir alyşdylar.
“Umumy geljek, umumy maksatlar” şygary astynda geçen forumyň çäklerindäki gepleşikler, habarda bellenmegine görä, “iki ýurduň arasynda yzygiderli ösdürilýän energetika hyzmatdaşlygynyň strategik häsiýete eýedigini görkezýär”.
Mundan öň Türkiýäniň Energetika we tebigy serişdeler ministrligi bilen Azerbaýjanyň Ykdysadyýet ministrligi Stambulda türkmen tebigy gazyny Azerbaýjanyň we Gürjüstanyň üsti bilen Türkiýä ibermek hakyndaky Ylalaşyga gol çekipdi.