Günorta Koreýanyň häkimiýetleri Özbegistanyň prezidenti Şawkat Mirziýoýewyň gyzynyň ýakyn ýoldaşy Komil Allamjonowy öldürmek synanyşygynda güman edilýän özbek raýaty Jawlon Ýunusowy tussag etdi.
Bu habary Azatlyga Günorta Koreýadaky we Özbegistandaky garaşsyz çeşmeler 14-nji noýabrda ýetirdi.
Özbegistanyň hukuk goraýjy edaralaryndaky çeşmeleriň biriniň sözlerine görä, Ýunusowyň tussag edilmegi dowam edýän derňewiň "öwrüm pellesi" bolup görünýär.
Özbegistanyň Seuldaky ilçihanasynyň wekili hem Ýunusowyň tussag edilendigini tassyklady, ýöne jikme-jik maglumat bermedi.
Interpol dünýäniň hukuk goraýjy edaralaryna ýüzlenip, Özbegistanyň talaby esasynda, adam öldürmek synanyşygynda aýyplanan 36 ýaşly Ýunusowy tapmagy hem-de tussag etmegi sorady.
Özbegistanyň baş prokuraturasynyň habaryna görä, bu diýilýän jenaýat 26-njy oktýabrda Daşkent sebitinde boldy.