Türkmenistanyň iň iri onlaýn söwda we bildiriş portallarynyň biri bolan Tmcars.Info saýtynyň üç gün çemesi möhlet bilen wagtlaýyn ýapylmagy ulanyjylaryň arasynda aljyraňňylyga sebäp boldy.
Söwda saýty we goşundysy 1-nji ýanwar – 4-nji ýanwar aralygynda ulanyjylara elýetersiz boldy.
2018-nji ýylda onlaýn ulag söwdasyna gönükdirilip esaslandyrylan mugt bildiriş portaly ilat arasynda meşhurlyk gazandy we wagtyň geçmegi bilen ýurduň iri internet bazaryna öwrüldi.
“Bir zat almakçy ýa-da satmakçy bolýan adamlar Tmcars.Info saýtynyň işlemeýändigini görüp, ynjalyksyz bolýarlar. Ýurduň ähli künjeklerinde bu internet bazaryndan giňden peýdalanylýardy” diýip, bir maryly ýaşaýjy saýt ýapylanda Azatlyk Radiosynyň habarçysyna gürrüň berdi.
Ýerli ýaşaýjylara görä, söwda portaly ýurtda harytlaryň we hyzmatlaryň aňsat alyşylmagyna ýardam berýär. Bu saýtda awtoulag söwdasyndan daşary, ýaşaýyş jaýlarynyň, mellek ýerleriniň, hojalyk harytlarynyň, tekstil önümleriniň, çaga oýunjaklarynyň we başga-da ençeme haryt görnüşleriniň söwdasynyň mahabatlandyrylmagyna, mugt bildiriş goýulmagyna mümkinçilik döredilýär.
Söwda portalynyň eýeleri we administratorlary saýtyň wagtlaýyn elýetersiz bolmagynyň sebäpleri barada ulanyjylara beýanat bermediler.
Web sahypasy söwda bildirişleri bilen bir hatarda habarlary we täzelikleri hem çap edýär. 1-4-nji ýanwar aralygynda saýtyň habarlary täzelenilmedi.
Soňky üç gün bäri, ulanyjylar onlaýn pikir alyşmalarda internet portalynyň ýapylmagynyň mümkin bolan sebäplerini ara alyp maslahatlaşýarlar. Sosial ulagmalarda paýlaşylan postlaryň birnäçesinde saýtyň hosting şertnamasynyň möhletiniň dolandygy aýdylýar. Beýleki käbir postlarda bolsa, saýtda tehniki işleriň geçirilýändigi aýdylýar.
Açyk çeşmelerde aýdylmagyna görä, internet portaly “Türkmentelekom” döwlet elektrik aragatnaşyk kompaniýasynyň hosting hyzmatlaryndan peýdalanýar.
“Saýtyň elýetersiz bolmagynyň sebäpleri barada habar berilmeýär. Öňünden hem duýdurylmady, bildiriş berilmedi. Näme üçin petiklediler, düşnüksiz” diýip, lebaply bir ulanyjy Azatlyk Radiosynyň habarçysyna gürrüň berdi.
Onuň sözlerine görä, ýerli ýaşaýjylar bu söwda portaly arkaly iş mümkinçilikleri boýunça bildirişler bilen tanyş bolup, boş iş orunlaryny hem gözläp bilýärdiler.
“Lebapda müňlerçe adam bu saýtdan peýdalanyp, gazanç edýärdi, maşgala ekleýärdi” diýip, bir ýerli ýaşaýjy Azatlyk Radiosynyň habarçysyna gürrüň berdi.
Mary welaýatyndan bolan bir onlaýn söwdagär Azatlyk Radiosynyň habarçysy bilen gürrüňdeşlikde saýtyň hödürleýän mümkinçilikleri barada gürrüň berýär.
“Awtoulag söwdasy, ulaglaryň ätiýaç şaýlarynyň söwdasy, öý goşlary, mellek ýerleri, kwartiralar, howly jaýlary, kireý jaýlar, satlyk jaýlar, hatda öý haýwanlarynyň söwdasy, iri we ownuk şahly mallar boýunça bildirişler goýulýar. Iş gerek bolsa, işgär gerek bolsa, saýtyň mahabat hyzmatlaryndan peýdalanyp bolýar. Kimdir biri dokumendini ýitiren bolsa, ýa-da kimdir biri dokument tapan bolsa, bu saýtda bildiriş goýulýar, dokumendiň eýelerini tapyp bolýar” diýip, maryly onlaýn söwdagär Azatlyk Radiosynyň habarçysy bilen gürrüňdeşlikde aýtdy.
Ulanyjylar bildiriş saýtyndan peýdalanmak üçin VPN hyzmatlaryndan peýdalanmagyň zerurlygynyň ýokdugyny, saýtyň göni açylýandygyny aýdýarlar.
Söwda portaly öz ulgamynda bir günüň dowamynda goýulýan bildirişleriň sanynyň bir müňden geçýändigini aýdýar. Saýtyň Android goşundysy Google Play ulgamynda şu wagta çenli bir million gezek indirilipdir.
Tmcars.Info saýty üç güne çeken arakesmeden soňra, 4-ni ýanwarda günüň birinji ýarymynda ulanyjylara gaýtadan elýeterli boldy.
Türkmenistan çäkli Internet mümkinçilikleri bilen tanalýar. Halkara hasabatlar ýurt raýatlarynyň haýal we gymmat Internet hyzmatlaryndan peýdalanýandyklaryny görkezýär.
Ýurtda Facebook, Instagram, Twitter ýaly iri sosial saýtlaryň, şeýle-de WhatsApp, Telegram ýaly iri messenjeriň petikli saklanylmagy ýurt raýatlaryny diňe ýerli Internet çeşmelerinden peýdalanmaga iterýär.
Halkara ylmy barlaglar ýurtda azyndan 122 müňden gowrak web salgysynyň petik astynda galýandygyny anyklady.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum