Şu ýylyň başynda Gurbanguly Berdimuhamedow prezidentlik wezipesinden çekildi. Ol Türkmenistany 16 ýyla golaý dolandyrdy. Wezipeden gidenden soňra hem ýokary täsirli bolmagyny dowam etdirýär.
Gurbanguly Berdimuhamedow mart aýynda, Türkmenistanyň prezidenti wezipesinden çekilip, bu wezipäni saýlaw arkaly ogly Serdara tabşyrdy.
Ol 2006-njy ýyldan bäri ýurdy demir penjede saklap gelen öňki ýolbaşçy Merkezi Aziýada berk düzgünde dolandyrylýan bu döwletde, öz ýokary täsirini elden bermeýär.
Ol özüni hakyky prezident ýaly alyp barýar, daşary ýurtlara saparlaryny dowam etdirýär hem-de döwlet baştutanlaryny garşy alýar, döwlet ýygnaklaryna gatnaşýar we ýurduň welaýatlaryna ýokary derejedäki saparlary amala aşyrýar.
65 ýaşly Berdimuhamedow öňküleri ýaly ýokary wezipeli resmi, Türkmenistanyň Milli geňeşiniň ýokarky palatasynyň, ýagny Halk Maslahatynyň başlygy wezipesini eýeleýär, ol bu orny 2021-nji ýylda özi döredipdi. Ol şeýle hem Arkadag resmi derejesini saklaýar.
Häzirki wagtda Berdimuhamedowyň peýdalanýan şeýle täsiri derejesi hem şan-şöhraty Türkmenistanyň prezidentinden başga hiç bir resmide bolmandyr.
Golaýda Berdimuhamedow Hazaryň kurort şäheri Awazada, üçtaraplaýyn sammitiň öňüsyrasynda, Azerbaýjanyň we Türkiýäniň prezidentlerini kabul etdi.
Döwlet mediasynyň 14-nji dekabrda beren maglumatyna görä, prezident Serdar Berdimuhamedow öz azerbaýjan we türk kärdeşleri bilen aýratyn duşuşyk geçiripdir.
Öňki prezident sammite gatnaşmakdan saklandy. Ýöne onuň aýaly, ýurduň ozalky birinji hanymy Ogulgerek Berdimuhamedowanyň Azerbaýjanyň we Türkiýäniň birinji hanymlaryny kabul etmegi köpleri geň galdyrdy.
Ogulgerek Berdimuhamedowa adamsy prezident wagtynda, köpçülige seýrek görünýärdi.
Resmi suratlarda çekilişine görä, Ogulgerek Berdimuhamedowa resmi çaý içişlik guralmazdan öňinçä, çeperçilik sergisine we konserte Mehriban Aliýewa hem Emine Erdogan bilen gatnaşdy. Türkmenistanyň häzirki birinji hanymy üçtaraplaýyn geçirilen sammitde asla görünmedi.
MYDAMA ÝOLDA
Soňky aýlarda uly Berdimuhamedowyň möhüm işleriniň gün tertibinde, Moskwa resmi sapar hem göz öňünde tutulypdyr. Ol 3-nji noýabrda Orsýetiň prezidenti Wladimir Putin bilen duşuşdy. Onuň ogly Kremlde iýun aýynda bolupdy.
11-nji noýabrda bolsa ozalky döwlet ýolbaşçysy Türki döwletler Guramasynyň sammitine gatnaşmak üçin, goňşy Özbegistana bardy. Oňa Gazagystanyň, Gyrgyzystanyň, Özbegistanyň we Türkiýäniň prezidentleri gatnaşdylar. Türkmenistan bu Guramada synçy statusyna eýedir.
Berdimuhamedow şeýle hem ýurduň bäş welaýatyna ýygy-ýygydan sapar edýär. Her gezeginde-de, ýerli dolandyryş edaralary köçeleri arassalamak we jaýlary agartmak üçin, müňlerçe adamy mobilizleýär ýa-da öňki lideri garşylamak dabaralaryna gatnaşmaga adamlary taýýarlaýar.
Geçen aýda ýurduň günbataryndaky Balkan welaýatynda Türkmenbaşy şäherine geçirjek saparynyň öň ýanynda, iki ýarym müňe golaý adamy esasy iş ýerlerinden aýyrmaly boldy diýip, Azatlygyň Türkmen gullugy habar berdi.
Ýerli ýaşaýjylar "soňky minuta çenli" öňki ýa-da häzirki prezidentiň geljekdigini bilmändiklerini aýtdylar.
Uly Berdimuhamedowyň noýabrda Mary şäherine eden saparynyň öň ýany, "Häzir anyk kimiň we haçan geljekdigi belli däl. Ýöne Berdimuhamedowlaryň biriniň Ýolöten etrabynda täze gaz edarasynyň düýbüni tutmana gelýändigi aýdylýar" diýip, Azatlygyň hökümete ýakyn çeşmesi aýtdy.
“Adamlar Berdimuhamedowlaryň haýsysynyň hakykat ýüzünde ýurdy dolandyrýandygyny bilmeýär. Olaryň haýsy biri dolandyrýanam bolsa, öz işine ýamamaz hötde gelýär” diýip, baýry žurnalistlerden biri Azatlyga aýtdy.
Döwlet mediasy ozalky prezidente "Biziň Gahryman Arkadagymyz" diýip ýüzlenýär, onuň geçirýän sapalaryny hem duşuşyklaryny giňişleýin beýan edýär.
Türkmenistanlylaryň köpüsi olaryň welaýatlara resmi saparlaryň öňüsyrasynda görülýän aşa ýokary taýýarlyk çärelerinden zeýrenýärler. Ýerli hökümet ýolbaşçylary bu ýapyk ýurduň düşen gedaýçylykly ýagdaýyny görkezmejek bolup, olaryň barjak ýerlerini gülala-güllük etmäge çalyşýarlar.
"Ýurduň ata we onuň ogul üçin, beýle täsin bezegler örtünmäge ýagdaýy ýok. Olar ýurdy maşgala biznesine öwrüpdirler” diýip, adyny tutmazlyk şerti bilen baýry žurnalist aýdýar.
"Berdimuhamedowlar öz dünýäsi bilen ýaşaýarlar, ol hakykatdan doly üzňe. Olar adamlaryň iýmäge zadynyň ýokdugyny bilmeýärler, belki-de, onuň aladasyny etmeýärler” diýip, ol sözüne goşýar.
Tebigy gazyň gorlary boýunça Türkmenistan dünýäde dördünji orny eýeleýär, muňa garamazdan, ilat belli derejede garyp bolmagynda galýar. Soňky ýyllarda türkmenistanlylaryň köpüsi dowamly azyk ýetmezçiliginden we esasy zerur harytlaryň bahalarynyň ýokarlanmagyndan ejir çekýärler.
Soňky onýyllyklarda giň ýaýran ýeter-ýetmezlik, parahorluk hem işsizlik millionlarça graždany ýurtdan çykmaga mejbur etdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum