Türkmenistanyň orta mekdeplerinde iki hepdä golaý dowam eden gyşky dynç alyş günlerinden soňra, 13-nji ýanwarda sapaklar gaýtadan "karantin okuw tertibinde" geçilip başlandy. Mekdep mugallymlary indi iki ýyl töweregi wagt bäri çylşyrymlaşdyrylan iş tertibinde işleýändiklerini aýdyp, özlerine hiç hili kompensasiýa berilmeýändiginden şikaýat edýärler. Bu barada "Turkmen.news" neşiri 13-nji ýanwarda habar berdi.
Garaşsyz neşir özüniň Türkmenistandaky çeşmelerine salgylanyp, klaslardaky okuwçylaryň ikä bölünýändigini, sapaklaryň 30 minut geçilýändigini aýdýar.
"Mugallymlar indi her bir synp üçin 45 minuda derek 60 minut sarp edýärler. Olar ikä bölünen synplaryň okuwçylary üçin aýry-aýry, iki gezek sapak geçýärler" diýip, neşir çeşmesiniň sözlerini sitirleýär.
Netijede, mugallymlar mekdeplerde 24 sagada derek 40 sagat çemesi sapak geçýärler. Kanuna laýyklykda, mugallymlaryň bir ýarym stawkadan, ýagny hepdede 36 sagatdan köp sapak geçmegi gadagan edilýär. Munuň üçin mugallymlara goşmaça töleg geçirilmeýär diýip, habarda aýdylýar.
Azatlyk Radiosyna bu maglumatlary öz ýurt içindäki habarçylaryna we çeşmelerine tassyklatmak ýa inkär etdirmek başartmady.
Ýurduň orta mekdeplerinde okuw-terbiýeçilik işiniň guramaçylygy boýunça “täze ýa-da karantin düzgünleri” barada ilkinji gezek 2020-nji ýylyň awgustynda habar berildi. Bu habar ýurtda wirus bilen keselleýänleriň we ondan ölýänleriň köpelýändigi baradaky maglumatlaryň fonunda peýda bolupdy.
Türkmen häkimiýetleri häzirki güne çenli ýurduň çäginde koronawirusyň ýeke ýagdaýynyň hem resmi taýdan hasaba alynmandygyny tekrarlaýar.
2020-nji ýylyň 1-nji sentýabrynda güýje girizilen düzgünlere laýyklykda, mekdeplerde okuwçylar synplarda biri-birinden 2 metr aralykda oturdylyp, her synpyň okuwçy sany 15 okuwçy bilen çäklendirildi. Şeýle-de, birinji synplar üçin sapagyň dowamlylygy 25 minut, 2-nji synpdan 4-nji synpa çenli okuwçylar üçin 30 minut, uly klaslar üçin 35 minut edilipdi. Sapaklaryň arasyndaky arakesme 5 minutdan 10 minuda, uly arakesme 10 minutdan 20 minuda çykarylypdy.
Mundan başga-da, mekdeplerde birnäçe giriş-çykyş gapylary açyk saklanmaly edilip, ene-atalaryň mekdebe girmegine çäklendirme girizilipdi we okuwçylardan, mugallymlardan we tehniki işgärlerden mekdebiň çäginde maska geýmek talap edildi. Bu düzgünler barada Türkmenistanyň Bilim ministrligine salgylanyp, türkmen hökümetine ýakynlygy bilen tanalýan internet neşirleri habar beripdi.
Soňky bir ýarym ýyl çemesi wagtyň dowamynda Azatlygyň habarçylary bilen anonim şertde söhbetdeş bolan mugallymlar sapaklaryň wagtynyň gysgaldylmagynyň, ýöne özleri tarapyndan okadylmaly sapaklaryň köpeldilmeginiň mugallymlaryň işini kynlaşdyrýandygyny birnäçe gezek gürrüň berdiler. Şeýle-de, olar munuň üçin özlerine goşmaça hak tölenmeýändigini hem aýtdylar.
Geçen ýylyň sentýabr aýynyň başynda türkmen häkimiýetleri orta mekdepleriň 7-11-nji synp okuwçylarynyň tomusky dynç alyş möhletini ilki 1-nji oktýabra çenli uzaltdy. Ýöne soňra habarçylarymyz häkimiýetleriň öz kararyny garaşylmadyk ýagdaýda üýtgedendigini we ýokary synp okuwçylar üçin okuwlaryň 6-njy sentýabrda başlamaly edilendigini habar berdiler.
Türkmen häkimiýetleri wirus aladalary sebäpli girizilýän düzgünler we olaryň raýatlara ýetirýän täsirleri barada aç-açan beýanat bilen çykyş etmeýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
