Marynyň Baýramaly etrabynyň geňeşliklerinde prokuratura hususy hojalyklaryň ýyladyşhanalarynda gaz ölçeýji abzallaryň oturdylyp-oturdylmandygyny barlaýar, şeýle-de geçen ýyllarda edilen tölegleri içginden seljerýär. Bu sebitiň käbir gaz işgärleriniň ýyladyşhana eýeleri bilen dildüwşüge girip, mümkin bidüzgünçiliklere ýol açandygy bilen bagly geçirilýän derňewleriň çäginde amal edilýär.
“Sebitiň hususy hojalyklary, goşmaça töleglerden gaçyp, ýyladyşhanalaryna gaz ölçeýjilerini oturtman gelýärdiler. Olar töleg sorap gelen gaz işgärleri bilen özara ylalaşyp, hamala, howlusynda ýyladyşhana ýok hökmünde hasaba aldyrýardylar. Ýa-da hasap kitabynda asyl ýakylan gazyň mukdaryny has az göwrümde görkezýärdiler we netijede has az töleg geçirýärdiler. Elbetde, bu hile üçin gaz işgärine para bermeli bolýardy” diýip, baýramalyly ýaşaýjylaryň biri 29-njy maýda habarçymyza gürrüň berdi.
Soňky birnäçe gün bäri geçirilýän barlaglaryň netijesinde kimiň ýyladyşhanasynda ölçeýji oturdylmadyk bolsa, ýa-da kimdir biriniň hasap kitabyndaky görkezijileriň üýtgedilendigi barada şübhe dörese, olar prokuratura soraga çekilýär.
“Sülçüler bu hile üçin uly jerimäniň bardygyny duýdurýarlar we anyk haýsy gaz işgärine para berendigini anyklaşdyrmagy talap edýärler. Mundan başga-da, sülçüler hususy ýyladyşhana eýeleriniň goňşularyny sorag edýärler. Olardan goňşularynyň näçe wagtdan bäri ýyladyşhanasynda bakja önümlerini ýetişdirýändigini, ýa-da tersine ýyladyşhana sökülen bolsa, onuň haýsy wagtdan ulanylmaýandygyny takyklaşdyrýarlar” diýip, habarçymyzyň söhbetdeşi belledi.
Degişli maglumat “Girdeji çykdajydan az bolýar”. Lebapda hususyýetçiler ýyladyşhanalaryny sökýärlerProkuraturanyň Baýramaly etrabynda geçirýän barlaglary barada, adatça bolşy ýaly, resmi derejede maglumat berilmeýär. Bu barada sebitiň kanun goraýjy edaralaryndan, häkimliklerinden hem kommentariýa almak başartmaýar.
Türkmenistanyň hökümet mejlislerinde tebigy gazdan tygşytly peýdalanmak barada wagtal-wagtal umumy gürrüňler edilýär.
Öý şertlerinde kiçi ýyladyşhanalary bolan daýhanlar, ýurtdaky höküm sürýän agyr ykdysady krizisiň arasynda, özleriniň bazar bolçulygyny döretmek ugrundaky tagallalaryna hökümet tarapyndan hemaýatyň berilmeýändigini aýdýarlar. Olar eger-de soralýan ähli tölegleri geçirseler, onda girdejiden çykdajylarynyň köp bolýandygyny belleýärler.
Azatlyk mundan öň, hususy ýyladyşhana eýeleriniň, çekýän dowamly zyýanlary sebäpli, bu usul arkaly bakja önümlerini ýetişdirmekden köpçülikleýin el çekip başlandyklary barada ençeme tapgyr maglumat beripdi.
Munuň netijesinde, ýurduň bazarlarynda onsuzam dowamly gymmatlaýan bakja önümleriniň, şol sanda pomidoryň we hyýaryň dagy bahalary telim esse ýokarlanypdy.
Marydaky habarçymyz harçlanan gazyň möçberini azaldyp hasaba alan gaz işgärleriniň biri bilen hem söhbetdeş bolmagy başardy. Anonimlik şertinde maglumat beren hünärmen agyr ykdysady ýagdaýlara salgylanyp, özüniň baş goşan korrupsiýa amallaryna düşündiriş bermäge synanyşdy.
Onuň sözlerine görä, gaz edarasy olaryň beýleki etraplaryň hojalyklaryny gapyma-gapy aýlanmak üçin goşmaça pul bermeýär, galyberse-de ýolbaşçylaryna gündelik näresmi pul planyny bermek talap edilýär. Ol bu ýagdaýlarda resmi taýdan alýan zähmet haklarynyň aglabasynyň diňe iş harajatlary, tutumlary üçin gidýändigini öňe sürdi.
Azatlyk bu aýdylanlary garaşsyz ýagdaýda tassykladyp bilmedi. Şeýle-de bularyň mümkin jenaýata baş goşmak üçin nä derejede delil bolup biljekdigi aýdyň däl.
Türkmenistanda indi ençeme ýyl bäri ilatyň azyk howpsuzlygynyň ýagdaýy uly mesele bolmagynda galýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.