ABŞ-nyň immigrasiýa we gümrük gullugy (ICE) 2023-nji ýylyň sentýabr aýyndan 2024-nji ýylyň sentýabryna çenli aralykda Özbegistana 572 adamy deportasiýa etdi.
ICE-niň neşir eden hasabatynda ýylyň dowamynda 271,484 adamyň 192 ýurda ugradylandygy bellenilýär. Geçen ýylyň degişli döwri bilen deňeşdirilende, deportasiýa edilenleriň sanynyň takmynan iki esse artandygy aýdylýar.
ABŞ-dan Özbegistana deportasiýa edilen özbek raýatlarynyň sany hem, geçen ýyl bilen deňeşdirilende, birnäçe esse köpeldi. 2023-nji ýylda Özbegistanyň 88 raýaty mejbury ýagdaýda yzyna, watanyna ugradyldy.
2024-nji ýylyň tomsunda Kaliforniýa serhet gullugyna Russiýadan, Gürjüstandan, Moldowadan, Gyrgyzystandan, Täjigistandan we Özbegistandan bolan resminamasyz migrantlary haýal etmän deportasiýa etmek tabşyrygy berildi. Bu karar deportasiýa prosesini çaltlaşdyrmagy we ABŞ-nyň immigrasiýa syýasatyny pugtalandyrmagy maksat edinýär.
Şeýle-de, 2023-nji ýylyň 1-nji oktýabryndan 2024-nji ýylyň maý aýynyň ahyryna çenli 57 müň 200 bikanun migrantyň ABŞ-nyň günorta serhedinden geçip, Kaliforniýa ştatyna barmaga synanyşandygy, şolaryň 2900 sanysynyň özbek raýaty bolandygy habar berildi.