Belarusda 2020-nji ýyldaky prezident saýlawlary wagtynda başlanan köpçülikleýin protestlerden bäri ýurduň 50 müňden gowrak raýaty syýasy sebäpler esasynda tussag edildi diýip, Belarusyň “Wesna” adam hukuklary merkeziniň wekili, ozalky syýasy tussag Leonid Sudalenko aýtdy.
“Wesnanyň” hasaplamalaryna görä, häzirki wagtda azyndan 5472 adam syýasy sebäpler esasynda açylan jenaýat işinde günäli tapylyp, dürli möhletlerde azatlykdan mahrum edildi.
Bu protestlere hökmürowan dolandyryjy Aleksandr Lukaşenkanyň altynjy möhlet prezidentligine ygtyýarlyk beren saýlawlaryň netijeleri sebäp boldy. Saýlawlaryň galplaşdyrylandygyny görkezýän subutnamalar ret edildi.
ABŞ, Ýewropa Bileleşigi we başga-da birnäçe ýurt Lukaşenkany saýlawda ýeňiji diýip ykrar etmekden ýüz öwürdi.