NATO-Ukraina Geňeşi 26-njy noýabrda Brýusselde ýygnanyp, Russiýanyň geçen hepde Ukrainada synag eden gipersonik orta uzaklyk raketasyny ara alyp maslahatlaşar.
Ukrainanyň we ýaranlygyň 32 agza döwletinden bolan wekilleriň ýygnagy Kiýew tarapyndan, Russiýa 21-nji noýabrda Ukrainanyň Dnipro şäherine zarba uranyndan soň çagyryldy. Prezident Wladimir Putin bu hüjümde ulanylan täze raketany “Oreşnik” diýip atlandyrdy.
Putin bu zarbanyň Kiýewiň ABŞ-dan uzak garaşylan rugsady alyp, Günbataryň beren uzak aralyk ýaraglaryny Russiýanyň has içindäki nyşanalara hüjüm etmek üçin ulanmagyna berlen jogapdygyny aýtdy.
NATO-Ukraina geňeşi geçen ýyl, Kiýew bilen hyzmatdaşlygy güýçlendirmek we Ukrainanyň NATO agzalygyna bolan isleglerini goldamak üçin, Wilniusda geçirilen NATO sammitinde döredildi. Ukrainanyň günbatar şäheri Ternopil 26-njy noýabrda, Russiýanyň pilotsyz uçarlarynyň eden hüjüminden soň, elektriksiz galdy.