Türkmenistanyň Daşary işler ministrligi ABŞ-nyň 45-nji prezidenti Donald Trampyň janyna howp salynmagy bilen baglanyşykly habary Türkmenistanda “uly howatyrlanma” bilen kabul edilendigini aýdýar. Bu barada Türkmenistanyň daşary syýasat edarasy 14-nji iýulda beýanat ýaýratdy.
Türkmen tarapy güýç ulanmak boýunça bu hereketi aýgytly ýazgarýar we Donald Trampa tiz wagtda sagalmagyny arzuw edýär diýip, beýanatda aýdylýar.
Mundan başga-da, beýanatda Türkmenistanyň terrorçylygyň ähli görnüşleriniň ýüze çykmasyna we jemgyýetde dartgynlygy döredýän syýasy süteme garşy göreşmek boýunça halkara tagallalarynyň işjeň gatnaşyjysy bolup çykyş edýändigi nygtalýar.
ABŞ-nyň Pennsilwaniýa ştatynda Donald Trampyň gatnaşmagynda geçirilen saýlaw mitinginiň dowamynda amala aşyrylan atyşyk, ozalky prezidentiň janyna kast etmek synanyşygy hökmünde derňelýär. Bu barada 13-nji iýulda ýerli häkimiýetler mälim etdi.
Hadysanyň dowamynda okuň Donald Trampyň sag gulagyny ýaralandygy aýdylýar.
Ýerli kanunçykaryjylar 13-nji iýuldaky hadysada iki adamyň, şol sanda ýaragdan ot açanyň ölendigini, başga-da iki tomaşaçynyň ýaralanandygyny mälim etdiler.
Noýabrdaky prezidentlik saýlawlarynda Respublikançylardan dalaşgär bolmagyna garaşylýan 78 ýaşly Trampa golaýdaky saglyk merkezleriniň birinde medisina hemaýaty berildi diýip, Trampyň metbugat wekili CNN-e aýtdy.
Trampyň syýasy bäsdeşi prezident Jo Baýden Trampyň sag-salamatdygyny eşitmäge hoşaldygyny aýtdy.
“Amerikada bular ýaly gazaplylyga ýer ýok. Biz bir millet bolup, muny ýazgarmaly” diýip, Baýden belledi.
Tramp 2017-2021-nji ýyllar aralygynda prezident bolupdy.