Aşgabatda şu gün prezident Serdar Berdimuhamedowyň we Wengriýanyň premýer-ministri Wiktor Orbanyň arasynda geçirilen duşuşykdan soň, türkmen-wenger gepleşikleri esasynda ikitaraplaýyn resminamalara gol çekmek dabarasy boldy diýip, TDH habar berýär.
TASS habar gullugynyň Wengriýanyň daşary işler we daşary ykdysady gatnaşyklar ministri Peter Siýýarto salgylanyp ýazmagyna görä, Wengriýa Türkmenistandan tebigy gaz import etmäge gyzyklanma bildirýär.
Wengriýanyň premýer-ministri Wiktor Orbanyň ýolbaşçylygyndaky wekiliýet Aşgabada dördünji gün geldi.
Türkmen metbugaty Türkmenistanyň Halk maslahatynyň başlygy Gurbanguly Berdimuhamedowyň şol gün Wiktor Orban bilen duşuşandygyny habar berdi. Söhbetdeşligiň barşynda söwda, energetika, senagat kooperasiýasy, logistika, oba hojalygy we hususy ulgam geljegi uly ugurlaryň hatarynda görkezildi.
Tebigy gazyň ägirt uly gorlaryna eýe bolan Türkmenistan özara bähbitli hyzmatdaşlyk üçin açyk we bu meseläni has içgin ara alyp maslahatlaşmaga taýýar diýip, habarda bellenýär.
Prezident Serdar Berdimuhamedow bilen premýer-ministri Wiktor Orbanyň arasynda bäşinji gün geçirilen gepleşiklerden soň birnäçe ugurda hyzmatdaşlyk boýunça ikitaraplaýyn resminamalara gol çekildi.
Gol çekilen resminamalar aşakdakylardan ybarat:
- Türkmenistanyň Daşary işler ministrliginiň Halkara gatnaşyklary instituty bilen Wengriýanyň Daşary işler we söwda ministrliginiň Diplomatik akademiýasynyň arasynda diplomatik taýýarlyk ulgamynda hyzmatdaşlyk babatda Özara düşünişmek hakynda Ähtnama;
- Myrat Garryýew adyndaky Türkmenistanyň Döwlet lukmançylyk uniwersiteti bilen Semmelweýs uniwersitetiniň arasynda akademiki we ylmy hyzmatdaşlyk etmek hakynda Ylalaşyk;
- «Türkmenstandartlary» baş döwlet gullugynyň Döwlet etalon merkezi bilen Budapeşt paýtagt şäher hökümetiniň diwanynyň Metrologiýa we tehniki gözegçilik müdiriýetiniň arasynda metrologiýa babatda ylmy-tehniki hyzmatdaşlyk etmek barada Özara düşünişmek hakynda Ähtnama;
- Türkmenistanyň Suw hojalygy baradaky döwlet komiteti bilen Wengriýanyň Içeri işler ministrliginiň arasynda suw serişdelerini dolandyrmak babatda hyzmatdaşlyk etmek barada Özara düşünişmek hakynda Ähtnama;
- Türkmenistanyň Bilim ministrligi bilen Wengriýanyň Daşary işler we söwda ministrliginiň arasynda “Stipendium Hungaricum” maksatnamasynyň çäklerinde 2024-2026-njy ýyllarda hyzmatdaşlyk etmek boýunça Özara düşünişmek hakynda Ähtnama;
- Türkmenistanyň Medeniýet ministrligi bilen Wengriýanyň Syýahatçylyk agentliginiň arasynda syýahatçylyk babatda Özara düşünişmek hakynda Ähtnama;
- Türkmenistanyň Medeniýet ministrligi bilen Wengriýanyň Medeniýet we innowasiýa ministrliginiň arasynda medeniýet babatda hyzmatdaşlyk etmegiň Maksatnamasy;
- Türkmenistanyň Hökümeti bilen Wengriýanyň Hökümetiniň arasynda maýa goýumlaryny höweslendirmek we özara goramak hakynda Ylalaşyk.
TASS habar gullugynyň ýazmagyna görä, Ukrainadaky konflikt we ÝB-niň Russiýa garşy girizen sanksiýalary sebäpli Ýewropada dörän energiýa krizisini ýeňip geçmek aladalarynyň arasynda, Wengriýa Türkmenistandan tebigy gaz almak bilen gyzyklanýar. Emma habarlarda bu gazyň nähili ýagdaýda import edilip bilinjekdigi aýdyňlaşdyrylmaýar.