Amerikanyň “Time” žurnaly ABŞ-nyň saýlanan prezidenti Donald Trampy 2024-nji ýylyň şahsyýeti saýlady.
"Trampyň syýasy taýdan gaýtadan dikelmegi Amerikanyň taryhynda görlüp-eşidilmedik zat" diýip, neşiriň makalasynda aýdylýar.
Makalanyň awtorlary iýul aýynda Pensilwaniýa ştatynda Trampyň janyna kast etmek üçin edilen synanyşygy ýatladylar. Respublikan kandidat şondan soň demokrat bäsdeşlerini ýeňdi, yraň atýan ýedi ştatda ýeňiş gazandy we soňky 20 ýylda halk ses berişliginde iň köp ses alan ilkinji respublikan boldy.
Tramp bu derejä 2016-njy ýylda hem mynasyp bolupdy. Şonda ol prezident saýlawynda ilkinji gezek ýeňiş gazanypdy.
Şeýle-de, Tramp Russiýanyň Ukrainada alyp barýan urşuny 24 sagadyň içinde duruzmak wadasyny berdi.
Saýlanan prezident žurnalistler bilen söhbetdeşlikde parahatçylyk ylalaşygyny baglaşmagyň öz aýdyşyndan has kyn boljakdygyny boýun aldy.
Tramp amerikan raketalarynyň Russiýanyň has içine zarba urulmagynda ulanylmagyna hem garşy çykdy, ol Ukraina berilýän goldawy gepleşiklerde Russiýa basyş etmek üçin ulanmakçy bolýandygyny aýtdy.