Eýrandaky prezidentlik saýlawlarynyň ikinji tapgyrynyň ýeňijisi, aram reformaçy Masud Pezeşkian öňümizdäki aýyň başynda täze wezipä kasam getirer. Bu barada ýerli media kanunçykaryjylara salgylanyp habar berýär.
69 ýaşly Pezeşkian 5-nji iýulda geçirilen saýlawlarda aşa-konserwatiw dalaşgär Said Jaliliden üstün çykdy. Içeri işler ministrligiň beren soňky sanlaryna görä, Pezeşkian sesleriň 53.7%-ni, Jalili hem 44.3%-ni almagy başarypdyr. Saýlawlara gatnaşyk 49.8% bolupdyr.
Ilki bilen, Pezeşkianyň ýeňişini ýurtda uly häkimiýete eýe ýokary ruhany lider Aýatolla Ali Hameneýi, “tanfiz” diýlip bilinýän çärede tassyklamaly bolar.
Mundan soň, “4-5-nji awgustda prezidentiň kasam kabul ediş dabarasy geçiriler” diýip, 7-nji iýulda döwletiň eýeçiligindäki IRNA habarlar gullugy mälim etdi.
Pezeşkian 2008-nji ýyldan bäri parlamentiň agzasydyr. Ol 2016-2020-nji ýyllar aralygynda, haçanda kanunçykaryjy organda aram we reformaçy deputatlar agdyklyk edende, spikeriň birinji orunbasary wezipesinde hem işläpdi.