“Uzgaztreýd” we “Turkmengaz” döwlet konserni Özbegistana eksport edilýän türkmen gazyny ýylda 2 milliard kub metre çenli köpeltmek baradaky ylalaşyga geldi diýip, türkmen metbugaty özbek metbugatyna salgylanyp habar berýär.
Bu ylalaşyk Aşgabatda, türkmen hökümetiniň başlygynyň ýangyç-energetika toplumyna gözegçilik edýän orunbasary Batyr Amanow bilen Özbegistanyň energetika ministri Ž.Mirzamahmudowyň arasynda geçirilen gepleşikleriň dowamynda gazanyldy diýiip, “Uzdaily” habar berýär.
Iki ýurduň resmileriniň özara peýdaly hyzmatdaşlygy giňeltmegiň geljegini ara alyp maslahatlaşyp, Türkmenistandan alynýan gazyň mukdaryny ýokarlandyrmak boýunça uzak möhletli şertnama baglaşmak meselesine garandygy aýdylýar.