Parahatçylyk boýunça Nobel baýragynyň eýesi Muhammed Ýunus Bangladeşdäki geçiji hökümete ýolbaşçylyk eder. Mundan öň, ýurduň uzak wagtlyk premýer-ministri Şeýh Hasina, ençeme hepde dowam eden ganly protestleriň arasynda, wezipesinden çekildi we ýurdy terk etdi.
Ýunusuň Günorta Aziýa yklymyndaky döwletiň geçiji hökümetine ýolbaşçylyk etjekdigi 7-nji awgustda irden yglan edildi. Bu baradaky karar ýurduň harby ýolbaşçylarynyň, Hasinanyň gitmegine itergi beren student protestleriniň gurnaýjylarynyň, iri telekeçileriň we raýat jemgyýetiniň wekilleriniň dagy gatnaşmagynda geçirilen maslahatda kabul edildi.
Protestler ilki başda girizilen hökümet iş kwotalaryna garşy nägilelik bilen başlandy, soňy bilen hem premýer-ministriň çekilmegine çagyryşlar bilen dowam etdirildi.
Hasinanyň uzak wagtlyk syýasy garşydaşy Ýunusuň, ýakynda Parižden yzyna dolanjakdygyna garaşylýar.