Adam hukuklaryna gözegçilik edýän Human Rights Watch (HRW) guramasy Gazagystanyň hökümetiň parahatçylykly tankytçylaryna we beýlekilere garşy ekstremizm we terrorçylyk kanunçylygyny “nädogry ulanyp”, adam hukuklary boýunça halkara kanunyny bozýandygyny aýtdy.
Hukuk toparynyň 27-nji awgustda çap eden 29 sahypalyk hasabatynda, Gazagystanyň Terrorçylygy Maliýeleşdirýän şahslaryň sanawyna goşulan adamlaryň maliýe gadagançylyklaryny başdan geçirýändikleri, munuň hem olara “agyr kynçylyklary” döredýändigi we netijede munuň olaryň kepillendirilen hak-hukuklaryny “bozýandygy” bellenilýär.
Hasabatda gazaply bolmadyk “ekstremist” ýa “terrorçy” diýlip häsiýetlendirilen etmişleriň, ilkinji nobatda jenaýat hökmünde häsiýetlendirilmeli däldigi hem nygtalýar.
“Eger-de Gazagystanda hökümete garşy parahatçylykly bir proteste gatnaşaýsaň, onda hökümet seni diňe bir ‘ekstremist’ hökmünde yzarlaman, eýse seni maliýe taýdan hem çäklendirip bilýär” diýip, Human Rights Watch guramasynyň Merkezi Aziýa boýunça ýokary derejeli hünärmeni Mihra Rittman hasabatda belledi.