Hezbollah toparynyň Ysraýylyň demirgazygyndaky Binýamina şäheriniň golaýyndaky harby baza dronlaryň “toplumy” bilen uran zarbasynyň netijesinde ysraýylly dört esger heläk boldy, şeýle-de onlarçasy, şol sanda ýedisi agyr ýaralandy. Bu 2023-nji ýylyň oktýabryndan bäri Ysraýyla garşy edilen iň ganly hüjümleriň biri boldy.
ABŞ Liwanyň günortasyndaky aglaba ýerlere gözegçilik edýän hem topar, hem-de syýasy partiýa bolan Hezbollahy terrorçy gurama hökmünde ykrar edýär. Ýewropa Bileleşigi toparyň harby ganatyny özüniň gara sanawyna goşdy, ýöne onuň Liwanyň parlamentinde orunlary eýeleýän syýasy bölümine garşy gadagançylyk girizmedi.
Ysraýylyň harbylarynyň 14-nji oktýabrda irden beren maglumatyna görä, hüjümde Tel Awiwden 60 km demirgazykda ýerleşýän harby baza nyşana alnypdyr. Başga goşmaça jikme-jikler bada-bat aýan edilmedi.
Adatdan daşary ýagdaýlar boýunça gulluklar Ysraýylyň Haifa etrabyna amala aşyrylan hüjümde azyndan 67 adamyň ýaralanandygyny mälim etdiler.
Hüjümiň jogapkärçiligini Hezbollah öz üstüne aldy.