Balkanyň Gyzylarbat etrabynda ilatyň ýaşaýyş jaýlarynda gaz üpjünçiligi ýaramazlaşdy. Munuň bilen bir wagtda, ilat arasynda elde ýasalan gaz peçlerini ulanýanlar köpelýär.
Gaz hünärmenleri bu peçleriň howpsuzlyk nukdaýnazaryndan ygtybarly däldigini aýdyp, bularyň köpçülikleýin ulanylmagyna alada bildirýär. Bu ýagdaýlar barada Azatlyk Radiosynyň habarçysy 8-nji ýanwarda sebitden maglumat berdi.
“Jaýlara berilýän tebigy gaz durnukly däl, yzygiderli kesilýär. Käte-de onuň basyşy birden ýokarlanyp, soňra ýene peselýär” diýip, ýerli ýaşaýjy anonimlik şertinde aýtdy.
Ýaşaýjylaryň ençemesiniň tassyklamagyna görä, olar bu mesele boýunça ýerli gaz üpjünçilik edarasyna, hatda “Balkangazüpjünçilik” müdirligine ýüzlenseler-de, oňyn netije alyp bilmändirler.
Degişli maglumat Tebigy gazyň, bug gazanlarynyň basyşy pes, köp gatly jaýlarda ýokarky gatlara ýylylyk barmaýarGaz üpjünçiliginiň ýaramazlaşmagy, howanyň temperaturasy gijelerine -3 gradusa çenli aşaklaýan şu günlerde ilatyň ýylynmak meselesinde kynçylyk döredýär.
Ýaşaýjylaryň käbiri elektrik peçleri satyn alyp, şolar bilen jaýlaryny ýylytmaga çalyşsa, ýene bir bölegi elde ýasalan gaz peçlerden peýdalanýar.
“Ýönekeý ussalar tarapyndan elde ýasalan peçler arzan bahadan satylýandygy üçin ilat tarapyndan uly isleg bilen satyn alynýar. Sebäbi elektrik peçleri satyn almaga köp hojalygyň maddy mümkinçiligi ýetmeýär. Şeýle-de, ýaşaýjylar gaz peçlerde hem öýleri ýyladyp, hem-de nahar bişirip, çaý gaýnadyp bilýärler” diýip, gyzylarbatly ýene bir ýaşaýjy anonimlik şertinde aýtdy.
Şol bir wagtda, gaz hünärmenleriniň we ýaşaýjylaryň ençemesi bu peçleriň howpsuzlyk nukdaýnazaryndan ygtybarly däldigini aýdyp, ilat tarapyndan bularyň köpçülikleýin ulanylmagyna alada bildirýär.
“Bular ýaly peçleri ulanmak üçin durnukly gaz üpjünçiligi gerek bolýar. Ýöne bizde gaz duýdansyz kesilip, soňra gaýtadan gelýär. Hojalyklaryň köpüsi bu peçleri gaz turbalaryna ýa-da boçkalara birikdirip, gazy ýakyp goýýarlar. Turbalardan gelýän gaz kesilip, soňra güýçli basyş bilen gaýtadan gelende, ýangyn döremek howpy juda ýokary bolýar” diýip, balkanly gaz hünärmeni anonimlik şertinde aýtdy.
Ol soňky bir aýa golaý wagtyň dowamynda ýaşaýyş jaýlarynda gaz bilen baglanyşykly ýangyn döräp, adamlaryň wepat ýa-da teniniň ýanmagy bilen bagly hadysalaryň hem köpelendigini belleýär.
Degişli maglumat Ýerli ýaşaýjylar köne gaz geçirijileriň täzelenmegini soraýar, gazyň basyşy pes bolmagynda galýar“Täze ýyl agşamy Gyzylarbat şäheriniň “29-njy gorodok” diýilýän ýerindäki bir hususy jaýda gaz üpjünçiliginiň duýdansyz kesilip, soňra gaýtadan berilmegi bilen, jaýda gaz toplanýar we elektrik çyranyň ýakylmagy bilen dörän uçgunyň netijesinde, toplanan gaz partlap, öýüň äpişgeleriniň we gapysynyň pytramagyna we içerdäki erkek adamyň teniniň derisiniň 45%-niň ýanmagyna getirýär. Häzir bu adam paýtagtyň ýanyk bejerýän lukmançylyk merkezinde bejergi alýar” diýip, ýagdaýlardan habarly gaz hünärmeni belledi.
Ol bu wakadan soň, etrabyň gaz üpjünçilik edarasynyň işgärleriniň ýaşaýyş jaýlaryna aýlanyp, hojalyklara barýan gaz turbalarynda tehniki gözden geçiriş işlerini geçirendigini hem aýtdy.
Azatlygyň ýokarda beýan edilen ýagdaýlar barada “Balkangazüpjünçilik” müdirligine jaň edip, telefon arkaly teswir almak synanyşyklary oňyn netije bermedi.
Türkmen hökümeti her ýylyň güýz paslynyň başynda medeni-durmuş maksatly desgalar bilen bir hatarda, ýaşaýyş jaýlarynyň ýyladyş ulgamlarynyň gyş möwsümine taýýarlanýandygyny we olaryň bökdençsiz işledilmeginiň gazanylýandygyny aýdýar.
Muňa garamazdan, gyş paslynda howanyň sowamagy bilen, ýurduň paýtagtynda we sebitlerinde ilat ýaramaz ýylylyk üpjünçiligi, gazyň, elektrigiň we suwuň kesilmegi bilen yzly-yzyna ýüzbe-ýüz bolýar.
Ýangyç serişdelerine baý Türkmenistanyň häkimiýetleri ilatyň gaz, suw, tok we ýylylyk üpjünçiliginde ýyllarboýy dowam edip gelýän bökdençlikleri aç-açan boýun alyp, mesele gozgamaýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.