10-njy oktýabrda Gazagystanyň prezidenti Kasym-Žomart Tokaýew resmi sapar bilen Türkmenistana geldi. Ony Aşgabadyň Halkara aeroportynda Halk maslahatynyň başlygy Gurbanguly Berdimuhamedow garşylady.
Tokaýewiň saparyna gabat, Aşgabatda belli gazak şahyry we akyldary Abaý Kunanbaýewiň ýadygärligi hem açyldy.
Paýtagtyň “Laçyn” seýilgähinde geçirilen çärä Tokaýew bilen birlikde, hökümet agzalarynyň, ýaşulularyň, beýleki emeldarlaryň, şol sanda Gurbanguly Berdimuhamedowyň hem gatnaşandygy habar berilýär.
Mundan başga-da, çäräniň dowamynda Tokaýewe "Magtymguly Pyragynyň 300 ýyllygyna" diýen medalyň gowşurylandygy hem bellenilýär.