Eýranda ýakynda geçirilen prezidentlik saýlawlaryny hamala boýkot etmäge çagyryş etmekde aýyplanyp iki sany Telegram kanalyna garşy iş açyldy we 100 töweregi adam soraga çekildi.
Eýranyň Adalat ulgamynyň metbugat wekili Asghar Jahangiriniň 10-njy iýulda žurnalistlere aýtmagyna görä, 500-e golaý Instagram hasaby hem “saýlaw bidüzgünçiliklerini” amal eden hökmünde kesgitlenipdir.
Jahangiri Telegram we Instagram hasaplarynyň anyk atlaryny tutman, olaryň “adamlary saýlawlara gatnaşmak höwesini gaçyrmaga synanyşandygyny” öňe sürdi.
Saýlawlaryň 28-nji iýundaky birinji tapgyrynyň öň ýany, Eýranyň hökümeti ses berişligi boýkot etmek we gatnaşygy kemeltmek ugrundaky tagallalary jenaýat hasaplaýan berk düzgünleri ornaşdyrdy.
Reformaçy kanunçykaryjy Masud Pezeşkian saýlawlaryň 5-nji iýuldaky ikinji tapgyrynda aşa berk syýasatçy Said Jaliliden üstün çykyp, ýeňiji boldy.