Türkmenistanyň bilim we terbiýeçilik edaralarynda täze 2023-2024-nji okuw ýylynyň başlanmagyna sanlyja gün galdy. Şu günler Balkan welaýatynyň çagalar baglary ene-atalaryň ellerine körpeleriň 1-nji sentýabrda ýanlary bilen getirmeli esbaplarynyň we harytlarynyň sanawyny gowşurýarlar. Ene-atalaryň ençemesi çagalar baglarynyň özlerinden edýän talaplarynyň ýyl-ýyldan artýandygyny aýdyp, sanawa nägilelik bildirýär.
Azatlyk Radiosynyň habarçysy sanawyň çagalar baglarynyň körpeleri mekdebe taýýarlaýan toparlaryna gatnajak çagalaryň ene-atalaryndan talap edilýändigini aýdýar.
“Bu sanawda bir sany uly guty standart list, bir sany uly we bir sany kiçi papka, bir guty ruçka, reňkli kagyz, dürli reňkdäki galamlar, sada galam, lineýka, 10 sany kletka, ýagny dar çyzykly depderler, albom, ýelim, hajathana kagyzy, çyg salfetka, gap-gaç ýuwujy serişde, tarelka, çemçe, bokal we düzülýän oýnawaçlar bar” diýip, habarçymyz aýtdy.
Degişli maglumat Ene-atalar çagalar baglaryndaky ýaramaz şertlerden şikaýat edýärlerEne-atalardan agzalan sanawdaky esbaplaryň ählisini iň giç öňümizdäki hepdäniň başyna çenli, ýagny 4-nji sentýabra çenli çagalar bagyna tabşyrmak talap edilýär.
Olaryň ençemesi sanawdaky esbaplaryň ählisini birde satyn almagyň örän kyndygyny aýdyp, olaryň her hepde bir bölegini getirip bermegi haýyş edýärler.
“Käbir ene-atalaryň haýyşy kanagatlandyrylsa-da, köpüsiniňki ret edilýär. Esbaplaryň we harytlaryň bahasy 200-300 manat aralygynda bolýar. Bu, ykdysady kynçylyklaryň arasynda, gurpdan düşen köp maşgala üçin uly serişde” diýip, balkanly bir ene aýtdy.
Köp ene-ata çagalar baglarynyň ýolbaşçylarynyň özlerinden edýän talaplarynyň ýyl-ýyldan artýandygyny aýdyp, sanawa nägilelik bildirýär.
“Türkmenistanyň bilim edaralarynda, esasanam çagalar baglarynda zerur bolan zatlaryň ählisi ene-atalaryň üstüne atylýar. Çagalar baglarynda abatlaýyş işlerini geçirmek üçin hem ene-atalardan pul ýygnalýar. Galyberse-de, çagaňy çagalar bagyna nobatsyz ýerleşdirmek üçin-de 200-300 ABŞ dollarynda para tölemeli” diýip, balkanly başga bir ene gürrüň berdi.
Azatlyk ýokarda beýan edilen ýagdaýlar barada Balkanyň Bilim bölüminden kommentariý alyp bilmedi.
Degişli maglumat Balkanda birinji synpa barjak körpelerden çagalar bagyna gatnandygy baradaky kepilnama talap edilýärTürkmenistanda mekdebe çenli bilim edaralary bir ýaşdan alty ýaşa çenli körpelere degişli bolup, olar iki görnüşli bilim maksatnamasyny öz içine alýar. Bir ýaşdan bäş ýaşa çenli mekdebe çenli kiçi ýaşly çagalaryň irki ösüşine we okuwyna üns berilse, bäş ýaşdan alty ýaşa çenli çagalar başlangyç mekdebe taýýarlanýarlar. Çagalary başlangyç mekdebe taýýarlyk Türkmenistanda hökmany talap bolup durýar.
Ýurtda mekdebe çenli bilim edaralarynyň aýlyk tölegi 2017-nji ýyla çenli 8 manada barabardy. Türkmen häkimiýetleri şol ýylyň oktýabrynda bu tölegi duýdansyz 10 esse ýokarlandyryp, 80 manada galdyrdylar.
Şonda ýurduň käbir çagalar baglarynyň müdirleri ene-atalara çagalaryň terbiýeçilik işleriniň hiliniň, iýmit üpjünçiliginiň ýagdaýynyň we arassaçylyk şertleriniň gowulanjakdygyny, şeýle-de olara bilim we terbiýe bermekde häzirki zaman serişdeleriň ulanyljakdygyny aýdypdylar.
Ýöne Azatlyk bilen söhbetdeş bolan, ýurduň dürli sebitindäki ene-atalaryň ençemesi şondan bäri hiç hili özgerişligiň bolmandygyny, muňa derek özlerinden edilýän talabyň we maliýe çykdajylarynyň ýyl-ýyldan artýandygyny aýdyp gelýärler.
Degişli maglumat Balkanyň çagalar baglarynda daşary ýurt multfilmleriniň gahrymanlarynyň oýunjaklary, egin-eşikleri gadagan edilýärGadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.