11-nji sentýabrda Täjigistanyň müftüsi Saýidmukarram Abdulkodirzoda paýtagt Duşenbäniň merkezi metjidinde hüjüm edildi.
Täjigistanyň Içeri işler ministrliginiň beýanatyna görä, hüjümde döwlet tarapyndan bellenen musulmanlaryň ýolbaşçysy Abdulkodirzoda şikes ýetipdir, emma onuň ýagdaýy kadaly bolmagynda galýar.
Maglumatda hüjümçiniň müftini “huligançylyk matlaplary esasynda, kesgir bir serişde bilen ýaralandygy” bellenilýär.
Hüjümçi häzir tussaglykda saklanýar. Onuň anyk näme sebäpden müftä topulandygy aýdyňlaşdyrylmaýar.
61 ýaşly Abdulkodirzoda 2010-njy ýyldan bäri Yslam Merkeziniň Alymlar Geňeşiniň başlygy wezipesinde işleýär. Bu edara Täjigistanda fatwalary çykarmak bilen meşgullanýar.