7-nji oktýabrda irden Ukrainanyň Russiýa tarapyndan basylyp alnan Krymyň Feodosiýa sebitindäki ýangyç ammaryna dronlar bilen uran zarbasynda, desgada ýangyn döredi. Bu barada Russiýanyň Telegram kanallary habar berýärler.
Ýerli ýaşaýjylar Fedosiýada ýerli wagt bilen irden sagat 4:30-larda birnäçe güýçli partlamanyň sesiniň eşidilendigini, soňra-da ýangynyň dörändigini gürrüň berdiler.
Krymdaky Russiýanyň dikme resmileri ýangyç ammaryndaky ýangyny tassykladylar, emma hüjüm barada hiç zat aýtmadylar.
Moskwanyň Krymdaky dikme ýolbaşçysynyň maslahatçysy Oleg Krýuçnikowyň Telegramda galdyran ýazgysyna görä, hüjümde adam pidalary bolmandyr.
Bu aralykda, Russiýanyň Goranmak ministrligi 7-nji oktýabrda irden Ukrainanyň atan 21 dronuny urandygyny, olaryň 12-siniň Krymyň üstünde ýok edilendigini habar berdi.