Balkanyň häkimiýetleri Balkanabat şäherinde köpçülikleýin çäreleriň ýene birini geçirdiler. Döwlet telewideniýesine reportaž taýýarlamak üçin geçirilen çärä býujet we sungat işgärleri, ýaşulular mejbury gatnaşdyryldy. Prezidentiň kakasy, Halk maslahatynyň başlygy Gurbanguly Berdimuhamedowyň Magtymguly Pyragyny wasp edip döredendigi aýdylýan goşgusynyň tanyşdyrylmagyna bagyşlanan çärede öňki döwlet baştutanynyň propagandasy ýaýbaňlandy.
17-nji awgustda G.Berdimuhamedow Aşgabatda gurulýan Magtymguly Pyragy medeni-seýilgäh toplumyna baryp, şol ýerde özüniň döredendigini aýdýan “Pähim-paýhas ummany Magtymguly Pyragy” atly goşgusyny okap berdi. Şondan soňra ýurtda bu goşgynyň tanyşdyrylmagyna bagyşlanan çäreler geçirilip başlandy.
“23-nji awgustda Balkanyň bilim we medeniýet bölümleri, muzeý, kitaphana we teatr işgärleri tarapyndan bu goşga bagyşlanan uly çäre geçirildi. Bu çäre baradaky reportaž 24-nji awgustda ‘Watan’ habarlary gepleşiginde efire berler” diýip, Azatlyk Radiosynyň sebitdäki habarçysy 24-nji awgustda gürrüň berdi.
Degişli maglumat Balkanda prezidentiň ejesiniň we enesiniň propagandasy ýaýbaňlanýarÇärä welaýatyň her bir etrabyndan 100-e golaý býujet işgäri, tanymal şahyrlar, ýaşuly nesil, studentler, sungat işgärleri, şol sanda aýdymçylar gatnaşdyryldy.
“Çärede olaryň welaýat kitaphanasyna we muzeýine gezelenç edýän pursatlary surata düşürildi. Çäre medeni merkeziň zalynda dowam edip, onda goşgynyň üsti bilen Gurbangulynyň waspy edildi. Aýdymçylar goşgyny aýdym we gazal edip aýtdylar” diýip, türkmenbaşyly mekdep mugallymy habarçymyza gürrüň berdi.
Býujet işgärleriniň ençemesi G.Berdimuhamedowyň özüni öwdürmek üçin Magtymgulyny "maska hökmünde ulanýandygyny we onuň abraýyndan peýdalanmaga çalyşýandygyny" aýdýar.
“Pyragy öwgä mätäç däl. Ol diňe türkmenler üçin däl, eýse dünýä üçin, dünýä edebiýaty üçin uly şahsyýet. Bu goşgy Arkadagyň özüni öwdürmäge niýetlenen nobatdaky propaganda çäresi. Mundan iki hepde ozal-da, Berdimuhamedowlar alajalary hem-de olary örmek üçin niýetlenen iş guraly bahana edip, tutuş ýurtda öz aýallarynyň waspyny etdirtdiler. Döwlet telekanallary, hususan-da ‘Watan’ habarlary gepleşigi diňe prezidentiň we onuň maşgalasynyň waspyny edýär” diýip, türkmenbaşyly mugallym belledi.
Mugallymyň gürrüňini edýän köpçülikleýin mejbury çäresi 11-nji awgustda Balkanabatda geçirilipdi. Şonda prezident Serdar Berdimuhamedowyň ejesi Ogulgerek Berdimuhamedowanyň gaýynenesi Ogulabat ejäniň "döreden alajalaryny hem-de olary örmek üçin niýetlenen iş guralyny” Döwlet muzeýine sowgat bermeginiň yz ýany, çärelerde iki zenanyň propagandasy ýaýbaňlanypdy.
Degişli maglumat Balkanda Gurbanguly Berdimuhamedowyň propagandasy ýaýbaňlanýarBalkanly býujet işgärleri we studentler bu çäreleriň kösençlikden, şol sanda maddy çykdajydan başga zat däldigini, olarda geýjek egin-eşikleri öz maddy serişdeleriniň hasabyna satyn almaly bolýandyklaryny aýdýarlar.
“200 kilometr uzaklykdaky şäherde geçirilýän çärelere gidip-gelmek meselesi hem öz üstümize ýüklenýär. Durşuna azap we görgi” diýip, türkmenbaşyly başga bir mugallym belledi.
Azatlyk ýokarda beýan edilen ýagdaýlar barada Balkanyň, Balkanabadyň we Türkmenbaşynyň häkimliklerinden kommentariý alyp bilmedi.
Soňky 16 ýyldan gowrak wagtyň dowamynda Türkmenistanda Berdimuhamedowlaryň şahsyýet kulty we maşgala kulty üznüksiz berkidilýär. Türkmen metbugaty on ýyldan gowrak wagt bäri öňki prezidentiň kakasyny, we atasyny, şeýle-de ejesini hem şöhratlandyrýar.
Dünýäniň iň ýapyk we repressiw ýurtlarynyň biri hasaplanylýan Türkmenistanyň hökümeti adam hukuklaryny depelemekde, söz-metbugat azatlygyny bogmakda we beýleki esasy azatlyklary berk çäklendirmekde ýyllarboýy tankyt edilýär.
Türkmenistanda 2024-nji ýylda Magtymguly Pyragynyň doglan gününiň 300 ýyllyk dabarasy belleniler. Bu dabara mynasybetli Aşgabatda Magtymguly Pyragy medeni-seýilgäh toplumyny açmak göz öňünde tutulýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.