Günbatar ýurtlarynyň Aşgabatdaky wekilhanalarynyň ýolbaşçylarynyň bazarlara aýlanyp görmek ähtimallygyndan howatyr edip, Balkanda häkimiýetler geçen hepdäniň dowamynda iňlis dili mugallymlaryny bazarlara satyjy hökmünde bellediler, şeýle-de söwda tekjelerinde emeli azyk bolçulygyny döretdiler. Bu barada Azatlyk Radiosynyň habarçysy sebitden maglumat berýär.
Azatlyk Radiosy Birleşen Ştatlaryň Aşgabatdaky ilçihanasynyň Facebook sahypasyna salgylanyp, 22-nji noýabrda Birleşen Ştatlaryň Türkmenistandaky ilçisi Elizabet Rudyň Balkan welaýatyna amala aşyran saparynyň tamam bolandygyny habar berdi. Ilçi bu sebitde ýerli kärhanalaryň we Türkmenistanda işleýän amerikan kompaniýalarynyň wekilleri bilen duşuşdy.
Degişli maglumat Prezidentiň kadr çalşygyndan soň, Balkanda ýagyň ýalan söwdasy gurnaldyAmerikanyň Birleşen Ştatlary maýa goýumlaryny we täjirçilik gatnaşyklaryny giňeltmegiň döredijilikli ýollaryny öňe sürýär, ykdysady ösüşe we hemmeler üçin abadan geljegi gurmaga uly ähmiýet berýär diýip, şonda Birleşen Ştatlaryň Aşgabatdaky ilçihanasy aýtdy.
Ýöne ilçiniň günbatar welaýata amala aşyran sapary sebit häkimiýetlerini adatdan daşary taýýarlyk çärelerine iterdi. Azatlyk Radiosynyň bu sebitdäki habarçysy şeýle taýýarlyklaryň çäklerinde ýerli häkimiýetleriň Türkmenbaşy şäheriniň bazarlarynda iňlis dili mugallymlaryny satyjy hökmünde oturdandyklaryny habar berýär. Şeýle-de, ýokary derejeli daşary ýurt myhmanlarynyň saparlarynyň fonunda, welaýatyň söwda nokatlarynda emeli azyk bolçulygy döredilipdir.
“Käbir bazarlarda, şol sanda ‘Kenar’ bazarynda we beýleki uly marketlerde emeli haryt bolçulygy döredildi. Türkmenbaşyda iňlis dili mugallymlaryna satyjylaryň eşiklerini geýdirip, olary bazarlarda satyjy hökmünde oturtdylar” diýip, balkanly ýaşaýjylar aýdýar.
Türkmenistanda döwlet ýolbaşçylary, galyberse-de ýokary wezipeli adamlar welaýatlara sapar edenlerinde, şuňa meňzeş adatdan daşary taýýarlyklar giňden ýaýbaňlanýar.
Diplomatlaryň günbatar welaýata amala aşyran saparynyň dowamynda, ýerli häkimiýetler Türkmenbaşy şäherinde, öndürilen ýyly 2015-njy ýyldan köne bolan ulaglaryň hem hereketini çäklendiripdirler.
“Myhmanlar gelip-gidýänçäler ýollarda diňe täze we gymmat bahaly ulaglaryň hereketine rugsat berdiler. Hamala, bizde ähli zat gülala-güllük, halk bolelin, baý durmuşda ýaşaýar diýip, görkezmek isleýärler” diýip, günbatar welaýatyň ýaşaýjylary aýdýar.
Media habarlarynda Balkan welaýatyna amala aşyrylan saparyň dowamynda daşary ýurt diplomatlarynyň bazarlara aýlanyp görendikleri ýa-da görmändikleri aýdylmaýar. Ýöne ýerli häkimiýetler ätiýaçdan taýýarlyk görüp, iňlis dili mugallymlaryny satyjy oturgyçlarynda oturdypdyrlar.
Ýöne ýerli häkimiýetleriň taýýarlygy diňe söwda tekjelerinde emeli bolçulyk we iňlis dilini bilýän mugallymlary bazarlara satyjy hökmünde bellemek bilen çäklenmändir.
Degişli maglumat Türkmenistanda ýag krizisi ýitileşýär. WIDEOAzatlyk Radiosynyň habarçysy günbatar welaýatda sişenbe, çarşenbe, anna we şenbe günlerinde häkimiýetleriň ýerli ýaşaýjylar bilen wagyz-nesihat duşuşyklaryny ýaýbaňlandyrandyklaryny habar berýär.
Mekdepleriň tomaşa zallarynda we medeniýet öýlerinde geçirilen ýygnaklarda azyk harytlarynyň ýetmezçiliginiň gizlin saklanylmagy wagyz edilipdir.
“Ýygnaklarda ýag nobatlarynda düzgün-tertibi saklamaklyk, nobatlary surata düşürýän adamlary anyklamaklyk, dowam edýän kynçylyklar barada nätanyş adamlaryň ýanynda gürlemezlik barada duýduryş berildi” diýip, şeýle ýygnaklara gatnaşan bir ýaşaýjy gürrüň berdi.
Bu duşuşyklarda Kärdeşler arkalaşyklarynyň işgärleri, Zenanlar guramasynyň wekilleri we häkimlik işgärleri söz sözläpdir.
Öňler şeýle ýygnaklar köplenç býujet işgärleri, ýa-da ilatyň belli bir gatlagy, meselem, mugallymlar, ene-atalar, talyplar ýa-da okuwçylar bilen çäklenýärdi. Ýöne bu gezek giň gerime eýe bolan ýygnaklara 18 ýaşdan uly bolan ähli raýatlar çagyrylypdyr.
Azatlyk Radiosy bu maglumatlar boýunça ýerli häkimiýetlerden resmi teswir alyp bilmeýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.