Birleşen Arap Emirlikleri Russiýa bilen Ukrainanyň arasynda 2000 sany uruş ýesiriniň alşylmagyna ýardam etdi diýip, BAE-nyň Türkmenistandaky ilçisi Ahmed Alhaý Al Hameli aýtdy. “Interfaks-Ukraine” habar agentligi bu täzeligi 27-nji noýabrda habar berdi.
BAE "Russiýa bilen Ukrainanyň arasynda 2000 [...] tussagyň alyş-çalyş edilmegini ýeňilleşdirip, "ynamdar araçy hökmünde möhüm rol oýnady” diýip, emirligiň ilçisi Aşgabatda BAE-niň Milli gününiň 53-nji ýyl dönümine bagyşlanan kabul edişlikde aýtdy.
Şýle-de ilçi BAE-niň ukrain-rus konfliktiniň parahatçylykly ýollar arkaly çözülmegi üçin tagalla etjekdigini aýtdy.
“Newscentralasia” neşiriniň ilçiniň sözlerine salgylanyp ýazmagyna görä, 2024-nji ýylyň birinji ýarymynda Türkmenistan bilen BAE-niň arasyndaky söwda dolanyşygy, 2023-nji ýyl bilen deňeşdirilende, 5,9% ýokarlandy.
Habarda aýdylmagyna görä, bu döwürde iki ýurduň arasyndaky söwdanyň mukdary takmynan 1 milliard 300 million dollara barabar boldy.