Şu günler Aşgabatdaky rus ilçihanasynyň öňünde Russiýa gitmek üçin rus wizasyny almak isleýän türkmen raýatlarynyň ýene uly nobatlary emele geldi.
Bu ýere üýşen adamlaryň ençemesi rus ilçihanasynyň websaýtynda onlaýyn nobata ýazylmak mümkinçiliginiň kadaly işlemeýändiginden şikaýat edýär. Bu barada Azatlyk Radiosynyň habarçysy 5-nji dekabrda paýtagtdan maglumat berdi.
“Ilçihananyň öňündäki adamlaryň käbiri onlaýyn nobata durup, talon alan bolsa-da, köpüsinde nobat talony ýok. Sebäbi olar onlaýyn nobata ýazylyp bilmän, ilçihananyň özüne gelip, nobata durmaga we wiza almaga çalyşýarlar” diýip, aşgabatly ýaşaýjy anonimlik şertinde aýtdy.
Degişli maglumat Aşgabatdan Moskwa biletleriň "näresmi" bahasy gymmatlaýarBellesek, Russiýanyň Aşgabatdaky ilçihanasynyň resmi maglumatlaryna görä, ilçihananyň hyzmatlaryndan peýdalanmak isleýän islendik raýat websaýt arkaly onlaýyn nobata durmaly.
“Websaýt amalyýetde kadaly işlemeýär. Doňup durýar, ýa-da ýazan maglumatlaryň ýitýär, maglumatlary kabul etmeýär we gaýtadan ýazmagy maslahat berýär, gaýtadan ýazsaň-da ýene şol zatlar gaýtalanýar” diýip, rus wizasyny almak üçin nobata ýazylmaga çalyşýan lebaply ýaşaýjy anonimlik şertinde aýtdy.
Azatlyk 5-nji dekabrda rus ilçihanasynyň websaýtynda onlaýyn nobata ýazylmaga çalyşdy. Ýöne redaksiýanyň yzygiderli eden synanyşyklary oňyn netije bermedi.
“Arza beriji hakda” maglumatlar doldurylandan soň, “indiki” düwmä basanyňda, ozal ýazylan maglumatlar öçüp, ýitirim boldy.
Şol bir wagtda, nobata duran ýaşaýjylaryň ençemesi ýüzlerçe dollar para beren raýatlaryň nobatsyz ilçihana girip, rus wizasyny alyp bilýändigini aýdýar.
“Ilçihananyň websaýtynda hasaba durmazdan, ilçihana nobatsyz girmeklige ýardam edýän adamlar bar. Olar bu hyzmat üçin $400 alýarlar” diýip, bu adamlaryň “hyzmatyndan” peýdalanan aşgabatly ýaşaýjylaryň ençemesi aýdýar.
Olar bu adamlaryň ilçihananyň içindäki işgärler bilen arabaglanyşygynyň bardygyna hem ynanýarlar.
Degişli maglumat Orsýete barýan türkmen raýatlary Türkmenistandan çykmakda kynçylyk çekýär“Sebäbi “hyzmatdan” peýdalanyp, içeri gireniňde, ilçihananyň işgäri senden habarly bolýar” diýip, ýaşaýjylar belleýär.
Azatlygyň ýokarda beýan edilen ýagdaýlar barada Russiýanyň Aşgabatdaky ilçihanasyndan telefon arkaly teswir almak synanyşyklary oňyn netije bermedi.
Türkmenistanda dowam edýän ykdysady kynçylyklaryň we giň ýaýran işsizligiň arasynda, soňky ýyllarda barha köp türkmen raýatynyň Russiýa gitmek isleýändigi we rus ilçihanasynyň öňünde adamlaryň uly nobatlarynyň emele gelýändigi barada Azatlygyň habarçylary yzygiderli maglumat berýärler.
Türkmenistanlylar Russiýa köplenç okamak, pul gazanmak we bejergi almak üçin gidýärler, olaryň arasynda hemişelik göçüp gidýänler hem bar.
Azatlyk Türkmenistandan Russiýa gitmek üçin uçar biletleriniň uly kynçylyklar bilen tapdyrýandygy, raýatlaryň bilediň döwlet bahasynyň üstüne para bermeli bolýandygy barada hem, soňky bir ýyldan gowrak wagtyň dowamynda ençeme gezek maglumat berdi.
Türkmen häkimiýetleri bu ýagdaýlar barada aç-açan mesele gozgamaýarlar. Resmi metbugatda hem bu barada hiç zat aýdylmaýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.